DILI, 18 Marsu 2025 (TATOLI) – Kondisaun saúde líder igreja Katólika, Papa Francisco, hetok di’ak hafoin halo tratamentu saúde iha ospitál Gemelli.
Tuir nota husi Vatikanu iha loron 17 Marsu, Papa ne’ebé internadu iha ospitál ne’e hahú menus utiliza oksijéniu altu fluxu ho kánula nazál.
“Iha momentu balun la uza [máskara] oksijéniu. Iha kalan, nia uza ventilasaun mekánika naun-invaziva”, Vatikanu hato’o.
Santu Padre tama iha ospitál Gemelli dezde loron 14 Fevereiru tanba sofre pneumonia bilaterál.
Liuhusi nota imprensa, Vatikanu mós informa katak situasaun Papa nafatin estavel no nia pasa nia loron entre orasaun, deskansa no atividade balun.
Lembra katak, dezde Papa moras, foin iha domingu, 16 Marsu, Vatikanu partilla fotografia Santu Padre ne’ebé reza hela iha kapela ida iha ospitál Gemelli, Roma, fatin nia halo tratamentu saúde tanba problema respiratóriu durante liu fulan ida.
Fotografia ne’e hanesan evidénsia dahuluk kona-ba kondisaun Papa dezde nia internadu iha ospitál.
Santu Padre (88) eskollidu sai Papa Benedito XVI iha idade 76 iha loron 13 Marsu 2013 no eskolla nia naran Francisco.
Papa ne’ebé moris iha Arjentina iha tinan 1936 ne’e sofre problema saúde oioin no iha tinan 2023 afeta ho infesaun respiratória no halo operasaun ba kabun atu hasai érnia.
Notísia relevante: Kondisaun Papa nafatin estavel no rezultadu raiu-xís hatudu iha melloria
TATOLI
