DILI, 18 Marsu 2025 (TATOLI)-Governu liuhosi Ministériu Asuntu Kombatente Libertasaun Nasionál (MAKLN), estende tán fulan-ida hodi simu reklamasaun no kontestasaun inklui simu dokumentu pendente tinan 2003 no 2005.
Ministru Asuntu Kombatente Libertasaun Nasionál, Gil da Costa Monteiro Oan Soru, hatete dadus provizóriu hosi diresaun nasionál ba pensaun no subvensaun, ho totál reklamasaun no kontestasaun ne’ebé simu ona iha 30.305. Tanba munisípiu balu seidauk kompleta dadus mai Konsellu Kombatente Libertasaun Nasionál (CCLN, sigla portugés) iha nasionál.
Nia dehan dadus rejistadu 2009 seidauk iha serteza. Ho ida-ne’e maka, konvokatóriu ida ohin ne’e deside ona hodi halo estensaun fulan-ida, hodi simu mós dokumentu pendente iha 2003 no 2005, inkui reklamasaun ka kontestasaun hosi primeiru-rejistu no segundu-rejistu 2009 nian”, Oan Soru dehan tersa ne’e.
Lista editál kombatente rejistadu iha segundu-rejistu tinan 2009 nian, tanba prazu ba publikasaun nian termina ona fulan-rua ka loron 60, sura hosi loron-15 fulan-Janeiru 2025 to’o loron-15 fulan-Marsu 2025, ho baze ba prazu legál ne’ebé prevee iha Estadu Kombatente Libertasaun Nasionál. Nune’e prazu estensaun ba fulan ida-ne’e hahú hosi 18 Marsu 2025 to’o loron-30.
Alende ne’e, nia dehan dadus pendente 2003 ho 2005 nian iha ne’ebé sei integra hamutuk hotu ho dadus segundu rejístu 2009 nian. Mabé, hirak ne’ebé altura ne’ebá foti ka simu ona osan, laiha ona dalan atu reklama tán.
Kona-ba dadus reklamasaun no kontestasaun iha lista editál kombatente rejistadu segundu rejistu 2009 nian, husu atu prosesa tuir de’it lei sira iha Estatutu Kombatente Libertasaun Nasionál.
“MAKLN ho CCLN sei kria ekipa ida hodi halo aproximasaun ba líder nasionál sira, husu sira-nian opiniaun ba problema veteranu”, dehan.
Karta sirkulár husi CCLN ho númeru 843/A-CCLN/III/2025 ho asinatura husi Prezidente Administrasaun CCLN, Vidal de Jesus Riak Leman, orienta sekretariadu kontinua halo atendimentu hodi simu folla reklamasaun ho kontestasaun nian ba fulan ida-tan.
Rejistu 2009 nian hahú husi 18 Marsu too 18 Abril 2025. Sirkular ne’e nu’udar orientasaun estrutura nasionál nian atu CMCLN hotu kumpre no hala’o iha ida-idak munisípiu.
Notísia relevante: Asaun veteranu Lautein la kestiona lista editál maibé alterasaun estatutu kombatente
Jornalista : Osória Marques
Editora : Rita Almeida
