DILI, 18 Marsu 2025 (TATOLI)-Reitór Universidade Nasionál Timor Lorosa’e (UNTL), João Soares Martins, konsidera kobransa ne’ebé akontese ilegal no viola regra administrasaun universidade-nian.
“UNTL só selu 30 dolar ba propinas, 20 dolar ba manutensaun edifísiu no dolar lima ba orientasaun, ne’ebé laiha tan kobransa oioin iha ne’ebá”, Reitór hatete iha Delta Nova, ohin.
Nia hatutan: “Ida-ne’e akontese, sira-ne’e ita-bolu kobransa ilegál no viola regra UNTL nian, tanba ne’e ami sei haree asuntu ida-ne’e tuir kobransa ne’ebé mak estudante sira selu, ami sei enkontru interna ho asosiasaun UNTL nian, depois foti solusaun”.
Antes ne’e Estudante foun husi UNTL lamenta ho atetude Asosiasaun Akadémika Estudantil (AAE), tanba halo kobransa ba estudante sira la-tuir regra universidade nian.
Tuir matadalan no regulamentu orientasaun akadémika UNTL nian iha artigu 7 katak rekezitu partisipante ba orientasaun akadémika mak fotokopia diploma tahan-ida, hanesan evidénsia ne’ebé nota katak estudante ne’e admitidu no kompleta ho foto kloridu tahan-rua.
Relasiona ho problema ne’e, portavós estudante foun, Lino Vaz, husu ba senadu no magnífiku Reitór UNTL atu devolve fali osan ne’ebé durante ne’e ekipa kobra husi estudante foun sira.
“Ami husu ba komisaun organizadora devolve fila estudante foun nia osan, ne’ebé entrega iha ámbitu rejistrasaun fakuldade ida-idak nian”, dehan Lino Vaz ba jornalista sira iha Kampus Sentrál UNTL.
Portavós ne’e dehan, fakuldade balu iha UNTL halo kritéria tuir vontade no la-tuir matadalan no regra universidade nian.
“Ita-hotu hatene katak orsamentu ba orientasaun akadémika apoia husi universidade, tanba estudante foun selu ona osan $5 ba universidade, maibé realidade ne’ebé akontese ba estudante foun, asosiasaun akadémika nafatin kobra estudante sira, hodi kontribui osan iha ámbitu orientasaun akadémika”, dehan.
Estudante, Benjamin Geovanio Matos, husu ba Reitór UNTL rezolve problema ne’e hodi kontinua fali fó atendimentu ba estudante sira ho dignu.
“Ami husu ba estrutura universidade, liuliu Magnifiku Reitór UNTL atu superviziona atividade rejistrasaun fakuldade, nune’e bele evita kobransa ilegál iha universidade, karik pontus hirak ne’ebé mak ami mensiona laiha resposta mak ami estudante foun nafatin ejize to’o hetan desizaun ne’ebé justu”, Benjamin husu.
Enkuantu kobransa husi Asosiasaun Akadémiku Estudantil hanesan Fakuldade Direitu husu osan dolar ida kada estudante hodi prodús kartaun orientasaun. Fakuldade Filozofia, Fakuldade Siénsia Sosiál kada estudante dolar ida ba fundu operasionál no dolar rua ba kartaun orientasaun, Fakuldade Enjeñaria kada estudante $15 ba kamizola fakuldade, dolar tolu ba sapeo akadiru, dolar tolu ba bote, dolar ida ba ai-sar, $0.50 ba kadernu no lapizera no $2.50 ba kartaun orientasaun, totál $25, Fakuldade Agrikultura kada estudante $11, Fakuldade Medisina no Siensia Saúde kada estudante $1.50 ba kartaun orientasaun no $0,50 ba kaixa assosiasaun, totál $2.
Fakuldade Turizmu, Artes, Indústria Kriativa no Kulturais kada estudante $5 ba bin familiár, $12 ba kamizola fakuldade no $1.50 ba kartaun orientasaun totál $18,50, Fakuldade Edukasaun kada estudante $8 ba kamizola fakuldade, $1.00 ba sertifikadu, $0,50 ba kas asosiasaun, $0,50 ba sirkulasaun atividade no $1 ba kartaun orientasaun hamutuk $11, Fakuldade Siensia Exata kada estudante $12 ba kamizola fakuldade no $5 ba bin familiar, totál $17.
Notísia relevante: Estrutura UNTL sei relata kaixa osan husi estudante ba Konsellu Jerál
Jornalista : Osória Marques
Editora : Rita Almeida
