DILI, 18 Marsu 2025 (TATOLI)—Diretór Nasionál Produtu Farmaséutiku no Medikamentu (DNFM) iha Ministériu Saúde, Delfim da Costa Xavier Ferreira, informa tinan oin (2026) Governu sei estabelese laboratóriu ba teste ai-moruk hodi garante kualidade konsumi ba populasaun nia saúde.
“Ami iha ekipamentu hanesan espektrofotómetru. Ita hein katak tinan oin mai laboratóriu sei funsiona,” Delfim ba TATOLI iha Ministériu Saúde, Kaikoli, tersa ne’e.
Nia dehan, Governu sei haruka mós profisionál saúde na’in-10 bá Austrália iha fulan-Outubru hodi tuir formasaun téknika laboratóriu ba teste ai-moruk nian.
“Bainhira laboratóriu ativu, ita garante sei la haruka tan teste kualidade ai-moruk ba rai-li’ur,” nia tenik.
Diretór ne’e haktuir katak kada tinan Governu haruka ona ai-moruk tipu-10 ba Laboratóriu Therapiutic Goods Adminsitartion Austrália hodi teste nia kualidade.
“Hahú tinan 2023 ami haruka ona ai-moruk tipu 21, hanesan xarope ho sira seluk bá Austrália, hodi teste maibé rezultadu hatudu hotu-hotu ho kualidade di’ak,” nia esplika.
Notísia relevante: DNFPM kontinua prepara item ai-moruk ba teste kualidade iha Austrália
Antes ne’e, Diretór Nasionál Farmásia Produtu Médiku (DNFPM) hateten tinan 2025 ne’e Diresaun Nasionál Farmásia Produtu Médiku nafatin prepara item ai-moruk atu bá teste kualidade iha Laboratóriu Therapiutic Goods Adminsitartion Austrália.
“Programa ida teste ai-moruk nia kualidade durante ne’e la’o tanba ita servisu hamutuk ho laboratóriu Austrália, más iha loron 25 Marsu tinan ne’e, ita sei ramata ita-nia akordu ho Austrália. Entaun, iha semana kotuk ami halo ona koordenasaun liuhusi zoom call ho parte Austrália atu haree, se ita iha proposta ruma, sira fó oportunidade ba ita atu haruka ita-nia amostra bá halo teste kualidade iha-ne’ebá,” Delfim konklui.
Jornalista: Felicidade Ximenes
Editór: Xisto Freitas da Piedade
