VIKEKE, 19 Marsu 2025 (TATOLI)—Autoridade Nasional Petróleu (ANP) liuhusi Diresaun Downstream, kuarta ne’e, introdús prosesu enkuadramentu ba setór Downstream nian ba autoridade lokál sira iha munisípiu Vikeke.
Notísia Relevante: ANP no Alfándega introdús desalfandegamentu petróleu refinadu liuhosi plataforma interkoneksaun
Diretór Diresaun Downstream husi ANP, Zelio Moniz, haktuir disemina enkuadramentu legál downstream nian ba Autoridade lokál iha munisipiu Vikeke, objetivu atu hakbiit koñesementu autoridade lokál sira-nian kona-ba atividade downstream no hametin koordenasaun entre ANP ho autoridade lokál, hodi regula atividade downstream liuliu kona-ba Postu Abastesimentu Konbustível (PAK).
“Ohin, ami-nia ekipa disemina setór Downstream nia papél atu regula no jere atividade Downstream sira-ne’ebé mak kompostu husi atividade prosesamentu fornesimentu no instalasaun prosesamentu konbusíivel armazenamentu no atividade abastementu. Ba ita-nia autoridade lokál sira iha minisípiu Vikeke atu sira iha koñesementu ba downstream nian,” Zelio Moniz hateten iha atividade diseminasaun, iha salaun Tilou, Vikeke Vila, ohin.
Enkuadramentu legál ida-ne’e, nia dehan, atu hasa’e no hakbiit koñesimentu husi líder komunitária sira inklui administradór postu no líder Konsellu Munisípiu sira, nune’e iha koñesimentu kona-ba atividade Downstream nian no Lei regulamentu sira-ne’ebé mak estabelese hodi jere responsabilidade ba atividade.
Tanba ne’e, ekipa Downstream aprezenta regulamentu tékniku nian ba autoridade komunitária sira oinsá operadór ba atividade Downstream.
Komunidade ne’ebé hakarak loke negósiu submete aplikasaun ruma ba planu negósiu, atu harii atividade Downstream sira, tenke iha koñesimentu regulamentu tékniku sira no oinsá atu prienxe rekezitu ba parte administrasaun nian.
Iha fatin hanesan, xefe suku Ossú de Cima, Celestino M. de Carvalho, hato’o agradesimentu ba ANP liuhusi diresaun downstream partilla atividade downstream kona-ba prosesu legál sira.
“Nu’udár autoridade lokál hato’o agradesimentu ba ekipa ANP ne’ebé mai partila informasaun downstream ba ami autoridade lokál sira iha munisípiu Vikeke. Ha’u rekomenta ba ANP atu kontrola atividade faan mina ilegál sira-ne’ebé ema faan iha dalan ninin sira-ne’e,” nia hateten.
Administradór Lakluta, Pascoal Gama Martins, rekomenda ANP haree mós postu abastesimentu ida iha Luka ne’ebé konstrui besik-liu iha estrada ne’ebé presiza haree, hodi labele okupa espasu estrada públiku.
“Ha’u hakarak husu ANP haree postu abastesimentu ida-ne’ebé foin hahú konstrusaun iha suku Luka ne’ebé rabat liu estrada. Tanba ne’e, ita la kontrola ho di’ak aban no bain-rua maibé sei fó impaktu ba movimentu no komunidade,” nis hateten.
Tuir dadus, postu abasteesimentu iha munisípiu Vikeke ne’ebé daudaun ne’e hala’o atividade negósiu la’o hamutuk tolu (3) mak iha postu Ossú, rua iha postu Vikeke Vila.
Entretantu, partisipa iha ddiseminasaun downstraem ne’e hetan partisipa husi komandante Polísia Nasionál Timor Leste (PNTL) munisípiu Vikeke, xefe aldeia, xefe suku 38 iha munisípiu Vikeke.
Jornalista : Vitorino Lopes da Costa
Editór : Cancio Ximenes
