DILI, 19 Marsu 2025 (TATOLI)-Importante ba Ensinu Sekundáriu Jerál no Tékniku Vokasionál (ESJ-TV) sira utiliza dijitalizasaun iha eskola. Tanba ne’e, Ministériu Edukasaun (ME) realiza workshop ba diretór edukasaun munisipál sira, kuarta ne’e iha INFORDEPE, Balide.
“Ohin diresaun tékniku vokasionál realiza workshop ida-ne’e hodi diretór edukasaun munisipál partisipa, akompaña no rona direitamente palestra hosi peritu sira kona-ba dijitalizasaun iha eskola”, hatete Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos.
Husi workshop ne’e, oinsá eskola sira iha portál rasik, nune’e bele halo publikasaun no promosaun ba ida-idak nian eskola.
Nia informa, tinan ne’e ME sei fahe komputadór ba eskola tékniku vokasionál sira inklui ba ensinu sekundáriu. “Ita seidauk bele hatete atu fahe hira, maibé sei distribui ba eskola tékniku vokasionál no sekundáriu jerál sira”.
Diretór Jerál Teknolojia Informasaun no Komunikasaun, Institutu Públiku, Venancio Pinto, hato’o preokupasaun. “Ita ko’alia dijitalizasaun maibé ita haluha infraestrutura, ida-ne’e mós problema atu halo buat ida, tanba buat sira ne’e hotu iha korelasaun ba-malu”, nia hatete.
Nia dehan, kestaun seluk ne’ebé presiza toma atensaun mak sentru dadus no mós seguransa.
Notísia relevante: ME hili Eskola ESJ 04 setembru ba implementasaun programa pilotu dijitalizasaun
Jornalista : Osória Marques
Editora : Rita Almeida
