DILI, 19 Marsu 2025 (TATOLI) – Governu aprova projetu rezolusaun ne’ebé define regra promosaun tranzitória ba membru Polísia Nasionál Timor-Leste (PNTL) hamutuk 2.700-resin tuir modalidade ne’ebé prevee iha artigu da-155 estatutu polisiál nian.
“Ohin ha’u aprezenta ba Konsellu-Ministru modalidade promosaun ba tranzitóriu ida. Ita halo tuir estatutu PNTL ne’ebé mak ein vigór iha artigu 155 ko’alia kona-ba modalidade neen ne’ebé presiza Governu halo atu rezolve problema internál PNTL nian, liuliu kestaun diviza no promosaun ne’ebé pendente barak”, Ministru Interiór Francisco da Costa Guterres, hateten iha Palásiu Governu, ohin.
Nia esplika katak depoizde halo análiza kle’an no halo konsulta tomak ba munisípiu no haree katak modalidade neen ne’e hamosu fórmula ne’ebé rezolve problema sira ne’ebé mosu.
Modalidade dahuluk mak ko’alia kona-ba promosaun antiguidade tinan sanulu ba leten no daruak mak veteranu sira.
“Sira ne’ebé antigu kombatente libertasaun nasionál, sira ne’ebé ita bele dehan katak balun grau 0 a 3, 4 a 7 ou 3 a 7, 8 a 14, ne’ebé Ministériu Interór propoin aprova mós modalidade ida-ne’e para depois sira-nia promosaun ne’e bazeia ba sira-nia grau no sira-nia tinan serbisu, katak 8 a 14 nia grau saida, se nia grau 3 nia tuir grau 3 ne’e, se nia 2 tuir grau 2 ne’e”, nia esplika.
Nia fó ezemplu kona-ba promosaun ba veteranu sira ne’ebé daudaun grau 1, maibé uluk iha ai-laran kaer kilat, nia komandante kompañia ida, entaun bele sa’e ba sarjentu xefe no inspetór asistente.
“Tanba ida-ne’e nia serbisu ne’ebé nia presta durante rezisténsia hasoru invazaun. Veteranu nian iha submodalidade ualu, ami propoin atu haree para ita konsidera serbisu bazeia ba sira-nia prestasaun, nia identifikasaun durante rezisténsia nia tempu ne’e”, adianta.
Ba modalidade datoluk mak ko’alia kona-ba sira ne’ebé uluk iha krize 2006-2008 to’o reestruturasaun PNTL nian iha 2010 kontinua hala’o serbisu. “Ida ne’e ita tenke fó onra ba sira-nia serbisu, tanba ne’e mak modalidade ida ko’alia kona-ba ida-ne’e”, Francisco salienta.
Modalidade dahaat promove klasse 1-25 no dalimak promove sira ne’ebé idade ona, ne’ebé tama dezde PNTL ne’e harii no nunka hetan promosaun.
“Tanba ne’e mak ita fó ba sira, tanba sira-nia idade 50 ba leten ona, ita fó pois sira ba reforma”, nia realsa.
Ministru ne’e dehan ba modalidade dahikus mak promove polísia sira ne’ebé uluk iha tempu misaun ONU asume kargu hanesan komandante munisípiu, eskuadra, segundu komandante seksaun, maibé kuandu iha reestruturasaun PNTL nian iha 2010 sira lakon hotu diviza.
“Ne’e mak agora ita rezolve problema ne’e, tanba iha tempu difísil ita fó serbisu ba sira atu konsolida instituisaun PNTL, repoin tiha orden públika, maibe tempu agora ita haluha tiha sira. Entaun, sira kuaze katuas hotu ona, ita rezolve tiha problema ne’e para depoizde ita dehan katak situasaun ne’ebé lori PNTL durante kria problema kona-ba kestaun lideransa ierárkia komandu ne’e ita rezolve ona para depois foun mai ierárkia loos ona, komandu ida de’it”, nia afirma.
Notísia relevante: https://tatoli.tl/2025/01/27/mi-sei-halo-uluk-promosaun-deviza-ba-membru-pntl-tinan-nee/
Jornalista: Arminda Fonseca
Editora: Maria Auxiliadora
