iklan

HEADLINE, SEGURANSA

Tinan ne’e, MI promove uluk diviza membru PNTL

Tinan ne’e, MI promove uluk diviza membru PNTL

Parada Membru PNTL iha ambitu aniversáriu PNTL ba dala-24, iha Kuartél UEP, Bairro-Pite Dili, kuarta (27/03). Imajen Tatoli/Francisco Sony

DILI, 27 janeiru 2025 (TATOLI)—Ministériu Interiór (MI) iha tinan ne’e (2025) sei halo uluk promosaun diviza ba membru Polísia Nasionál Timor-Leste molok hakat halo rekrutamentu ba membru PNTL foun no reforma dignu.

“Agora, ekipa ne’e serbisu maka’as hela. Sira la’o to’o tiha ona iha munisípiu hodi konsulta ho sira (membru polísia). Hotu iha munsípiu, sira mai aprezenta ba komandu no komandu aprezenta mai ha’u no ha’u sei lori liubá Konsellu Ministru hodi aprova nune’e bele loke dalan ba promosaun,” Ministru Interiór, Francisco da Costa Guterres, hateten ba jornalista sira bainhira partisipa iha serimónia avaliasaun prioridade lima Komandu Jerál PNTL 2023-2028 ne’ebé hala’o iha Suai Room, Timor Plaza, segunda ne’e.

Nia esplika, promosaun diviza ne’e bazeia ba artigu 155 husi Estatutu Pesoál PNTL ne’ebé mak Prezidente Repúblika foin promulga, iha-ne’ebá sita katak Komandu PNTL halo uluk promosaun diviza ba membru sira molok avansa ba rekrutamentu no reforma dignu ba nia membru sira.

Governante ne’e dehan promosaun diviza ba membru  PNTL sei akontese iha 27 marsu 2025, iha ámbitu komemorasaun aniversária PNTL ba dala-24.

“Promosaun ne’e hahú husi diviza  ida ki’ik, husi ajente polísia to’o inspetór, maibé ofisiál superiór ne’e la tama,” nia haktuir.

Governante ne’e klarifika katak promosaun diviza prioridade ba ajente no inspetór sira de’it tanba ofisiál no superiór sira hakarak hadi’a no rezolve uluk sira-nia karreira promosaun depois mak bá ofisiál superiór.

Estatutu PNTL Artigu 155 ne’e ko’alia kona-ba modalidade neen (6) ne’ebé membru PNTL sira tenke iha atu hetan promosaun diviza. Modalidade dahuluk ko’alia kona-ba sira-nia atividade ne’ebé liu ona tinan sanulu (10) Governu tenke promove, modalida daruak kona-ba sira ne’ebé uluk membru libertasaun funu ka veteranu Governu tenke promove, modalidade datoluk tenke promove membru PNTL ne’ebé iha krize 2006-2008 kontinua iha eskuadra ka kuartél mantein sira-nia servisu hodi fó apoiu ba populasaun durante krize nia laran, modalidade dahaat tenke promove Klasse 1-25, modalidade dalimak promove sira ne’ebé Klasse 26-73 ho idade tinan 50 bá leten, modalidade daneen promove sira ne’ebé iha UNTAET nia tempu sai hanesan komandante eskuadra, komandante seksaun no kargu xefia sira.

 Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!