DILI, 19 Marsu 2025 (TATOLI)—Komisaun B iha Parlamentu Nasionál (PN) ne’ebé trata asuntu Negósiu Estranjeiru no Defeza ho Seguransa, foin lalais hala fiskalizasaun hodi observa direta kondisaun Ró Militár ba klase Jaco ne’ebé avaria durante tinan barak ona iha tasi-ibun área Behau, Manatutu.
“Bazeia ba fiskalizasaun komisaun iha Forsa Navál, kona-ba ita-nia ró operasaun ne’ebé mak a’at, Timor-Leste sosa ró ne’e ho millaun $14, maibé a’at no manutensaun seidauk di’ak 100%. Tanba ne’e, Komisaun bá to’o iha fatin hodi haree, nune’e bele halo manutensaun iha futuru mai,” Vise-Prezidente Komisaun B, Luís Roberto, hateten hafoin reuniaun komisaun iha PN, kuarta ne’e.
Deputadu ne’e haktuir, ró ne’e momentu iha Governu anteriór halo kontratu ho ajénsia internasionál husi Indonézia mak atu mai halo manutensaun hamutuk ho tékniku FALINTIL-Forsa Defeza Timor-Leste (F-FDTL) husi komponente Nával maibé la konsege.
“Tanba ne’e ita-nia forsa Nával sira mós husu Komisaun atubele husu Governu halo kontratu ho tékniku sira husi Xina, tanba ró ne’e ita sosa iha Xina,” nia akresenta.
Notísia relevante : Ministériu Defeza mantein halo manutensaun ba Ró Militár Jaco maibé sei koalia ho
Komisaun husu Governu liuhusi Ministériu Defeza no komandu F-FDTL atu tau orsamentu iha tinan 2026 ba manutensaun nune’e fasilita komponente Nával halo operasaun kontrola iha tasi.
Tuir Deputadu bankada opozisaun husi Kmanek Haburas Unidade Nasionál Timoroan (KHUNTO) ne’e, presiza iha fasilidade hanesan ró hodi apoiu serbisu komponente Navál kontrola rikusoin iha tasi tanba kada tinan atividade ilegál hanesan foti subar ikan iha tasi, brle halo prejuizu ba Estadu.
Antes ne’e, Ministru Defeza, Donanciano Costa Gomes Pedro Klamar Fuik, hateten ministériu sei ko’alia ho komandu F-FDTL atu halo fali manutensaun ba ró militár Jaco.
Ró komponente Nával rua, hanesan Jaco no Betano hanesan ho meiu klase Shanghai ne’ebé iha Governu anteriór hola husi Xina.
Jornalista : Nelson de Sousa
Editora : Julia Chatarina
