DILI, 19 Marsu 2025 (TATOLI)—Membru Komisaun A iha Parlamentu Nasionál (PN), foin lalais ne’e, hala’o estudu komparativu iha Vietname hodi haree esperiénsia ba implementasaun Rejime Jurídiku Garantia Mobiliáriu.
Prezidente Komisaun A, Patricínio dos Reis Fernandes, hateten, razaun estudu ne’e tanba Governu husu Parlamentu atu halo debate no aprovasaun ba proposta-lei Rejime Jurídiku Garantia Mobiliáriu.
“Ami haree foun oituan, antes aprova hanoin tanba ne’e iha ligasaun ho banku no devedór sira, buat ne’ebé ita presiza kuidadu duni oituan oinsá atu introdús lei ida, presiza haree implementasaun sistema hanesan ne’e iha país ne’ebé mós implementa ona sistema ne’e,” Patricínio dos Reis Fernandes informa ba jornalista sira, iha resintu PN, kuarta ne’e.
Komisaun A nota Vietname ninia ekonomia avansadu no sira implementa ona sistema garantia mobiliáriu ho di’ak tebes.
“Ema iha kualkér saida de’it bele utiliza nu’udar garantia atu asesu ba kréditu iha banku sira atu dudu sira-nia ekonomia. Timor-Leste ita hanoin tama situasaun ne’e presiza duni, maibé ita hanoin buat ne’e foun. Tanba ne’e presiza apreende no haree esperiénsia oituan iha ema nian,” nia akresenta.
Atividade ne’e Komisaun hala’o koordenasaun ho Banku Sentrál Timor-Leste (BCTL, sigla portugés) no International Finance Corporation (IFC).
Notísia relevante : Governadór BCTL: “Garantia Mobiliáriu atu fasilita ema halo negósiu”
BCTL, IFC no Komisaun A halo vizita traballu ba Hanoi-Vietname, iha loron 12 to’o 15 Marsu.”, ho objetivu atu apreende esperiénsia Vietname kona-ba implementasaun Rejime Garantia Mobiliária inklui funsionamentu ba sistema sentrál rejistu mobiliáriu.
Membru Komisaun A esplora informasaun no hetan koñesimentu direta no esperiénsia husi nasaun ne’ebé implementa rejistu mobiliáriu inklui hetan informasaun no koñesimentu komprensivu kona-ba importánsia Rejime Garantia Mobiliária ne’ebé mak fó kontribuisaun direta ba espansaun no asesu merkadu kréditu, liuliu setór empreza mikro no médiu sira.
Durante iha vizita, delegasaun hala’o enkontru ho entidade oinoin hanesan hasoru malu ho Reprezentatante IFC iha Vietname, Banku Sentrál Vietname, Asembleia Nasionál Vietname, Departamentu Rejistu Garantia Mobiliária no state compensation, VB Bank ne’ebé hanesan banku ida koñesidu iha Vietname no ikus liu ho asosiasaun banku hotu iha Vietname.
Antes ne’e, Komisaun A hala’o ona audéliénsia públika ba proposta-lei númeru 10/VI(1a)-Rejime Jurídiku Garantia Mobiliáriu ho entidade relevante hodi rona sira-nia hanoin nune’e bele halo apresiasaun inisiál hafoin halo relatóriu paresér hafoin envia ba meza PN hodi kontinua ajenda diskusaun iha faze jeneralidade iha plenária, hafoin ne’e sei kontinua ba espesialidade no finál globál.
Jornalista : Nelson de Sousa
Editora : Julia Chatarina
