DILI, 19 Marsu 2025 (TATOLI)—Ministru Interiór, Francisco da Costa Guterres, hateten membru Polísia Nasionál Timor-Leste (PNTL) hamutuk 2000-resin mak sei hetan promosaun diviza iha ámbitu aniversáriu PNTL ba dala 25, iha 27 Marsu 2025.
“Promosaun ne’e ba diviza tranzitória, ajente to’o inspetór sira,” Francisco informa ba jornalista sira hafoin partisipa enkontru Konsellu Ministru ordináriu, iha Palácio do Governo, kuarta ne’e.
Nia esplika promosaun diviza tranzitória ne’e ba membrru PNTL ne’ebé mak ho diviza ajente to’o inspetór xefe de’it, enkuantu sira-ne’ebé mak diviza husi superintendente asistente ba to’o superintendente xefe ne’e politikamente deside, maibé alvu ne’e ba ajente to’o inspetór xefe.
Notísia relevante: Tinan ne’e, MI promove uluk diviza membru PNTL
“Sira-ne’e sei promovidu iha 27 Marsu. Seremónia ne’e sei hala’o iha Palácio do Governo. Kandidatu promovidu sira sei la mai hotu kedas. Ita sei halo reprezentasaun depois mak komandu sei bá halo promosaun tula diviza ba sira,” nia adianta.
Governante ne’e husu ba membru PNTL husi ajente to’o inspetór xefe ne’ebé mak hetan oportunidade atu hetan promosaun, karik komete kazu ruma, komandu trava lai tanba promosaun ida-ne’e mós iha ninian disiplina.
Ministru Francisco salienta katak hafoin Governu rezolve tiha promosaun tranzitória ne’e, faze tuirmai avansa ba rekrutamentu.
Jornalista: Natalino Costa
Editór: Xisto Freitas da Piedade
