DILI, 19 Marsu 2025 (TATOLI)–Ministériu Juventude, Desportu, Arte no Kultura (MJDAK) servisu hamutuk ho Sekretaria Estadu Arte no Kultura (SEAK) no Autoridade Munisípiu Aileu lansa soru tais liuhusi hala’o formasaun soru tais ba soru-na’in lokál sira ho durasaun semana ida, iha Edifísiu Administrasaun Munisipál Aileu, tersa (18 Marsu) ne’e.
Notísia Relevante: Governu sei lansa atividade soru tais iha Aileu
Ministru Juventude, Desportu, Arte no Kultura (MJDAK), Nelyo Isaac Sarmento no Sekretáriu Estadu (SEAK) Jorge Soares Cristovão no Prezidente Autoridade Munisipál Aileu João Bosco dos Santos prezide serimónia abertura, ne’ebé fasilita husi Diresaun Nasionál ba Promosaun Arte no Kultura (DNPAK).
Formasaun ne’e ho tema “Prezerva patrimóniu kulturál husi ita-nia bei’ala sira nu’udar identidade kulturál”, ho objetivu atu hasa’e koñesimentu no abilidade husi soru-na’in lokál sira, hodi fó dalan ba sira atu forma grupu auto-sustentável no kontribui ba ekonomia lokál.
Ministru Nelyo Isaac hateten iha nota ne’ebé Agência TATOLI asesu husi mídia MJDAK katak, valór intrínieku Taís nian nu’udar tradisaun timoroan nian no nia potensiál ba dezenvolvimentu ekonómiku.
“Taís la’ós de’it símbolu moris no mate nian; hanesan meiu ida empoderamentu ekonómiku nian. Liuhusi Diresaun ba Promosaun Produtu Orijinál Timor nian, ami iha kompromisu atu haburas koñesimentu kle’an kona-ba arte soru Taís nian,” Nelyo dehan.
Prezidente Autoridade Munisípiu Aileu, João Bosco dos Santos, hateten importánsia husi formasaun nu’udár inísiu foun ba Aileu.
“Inisiativa ida-ne’e, ho partisipasaun husi Ministru no Sekretáriu Estadu, marka momentu krusiál ida ba ita-nia munisípiu. Munisípiu Aileu nia papél istóriku nu’udar fonte koto ba munisípiu sira seluk, enkuantu nota bandu tradisionál kona-ba soru Taís iha Aileu nia laran rasik. Agora, iha ita-nia era ukun-aan, ita tenke kompete iha merkadu kulturál hamutuk ho munisípiu sira seluk,” João tenik.
Iha fatin hanesan, Koordenadora Teseladora Taís husi Grupu Hakur, Verónica Salumanu fó sai detallu kona-ba trajetória moris-hi’as teselajen ka soru tais Aileu nian.
“Dezde 2022, ho apoiu husi Fundasaun Alola, ami identifika no uza kabas no kór lokál sira. Ami estabelese ona uma soru tradisionál ida no agora daudaun dezenvolve hela motivu Taís ida ne’ebé eskluzivu ba Aileu,” Verónica hateten.
TATOLI
