VIKEKE, 19 marsu 2025 (TATOLI)—Xefe Sentru Saúde postu Vikeke Vila, munisípiu Vikeke, João Corte Real, husu Governu liuhusi Ministériu Obra Públika (MOP) hadi’a estrada ligasaun Vikeke ba suku Uaimori, tanba iha tempu udan difikulta distribuisaun ai-moruk bá postu saúde Uaimori.
Notísia Relevante: Kondisaun estrada Uaimori Viqueque difikulta kontrusaun eskola Pre-eskolár Sebastião Gomes
“Ha’u hakarak husu ba Governu tau atensaun ba dalan liga suku Uaimori, tanba agora tempu udan ne’e ami iha sentru saúde atu distribui ai-moruk ba postu saúde Uaimori ne’e susar tebes. estrada ne’e taho mak nakonu, ne’ebé karreta saúde nian lori ai-moruk ba ne’ebá susar tebes. Tan ne’e, mak ha’u ba parte kompetente fó atensaun ba dalan atu labele difikulta ba ami-nia servisu,” João Corte Real hateten ba Agência Tatoli iha nia kna’ar fatin iha postu Vikeke Vila, ohin.
Xefe sentru saúde Vikeke Vila ne’e dehan, kada trimestre ida sentru saúde Vikeke Vila tenke distribui ai-moruk ba postu saúde Uaimori ne’ebé distánsia dook husi postu Vikeke Vila.
“Ami agora atu distribui tán ai-moruk ba postu saúde Uaimori, maibé estrada aat. Nune’e, ami hein udan para ne’e mak foin bele distribui ai-moruk ba postu saúde Uaimori,” nia hateten.
Nia relata, daudaun ne’e estoke ai-moruk iha postu saúde sei sufisiénte hodi fó atendementu ba komunidade iha suku Uaimori, maibé kuandu ai-moruk estoke hotu ne’e servisu saúde sei buka meu hodi distribui ai-moruk ba postu saúde, atu labele difikulta ba komunidade ne’ebé enfrenta moras.
“Tan ne’e, ha’u prefere ba Governu fó atensaun ba estrada sira-ne’e, hodi labele difikulta ba ami-nia servisu sira liga ba atendementu ba komunidade iha área rural,” nia hateten.
Iha fatin seluk, Diretór Servisu Obra Públika munisípiu Vikeke, Casildo Gomes, rekoñese estrada liga ba suku Uaimori difikulta tebes ba komunidade ne’ebé atu dezloka ba suku Uaimori tanba kondisaun udan sai preokupasaun ema hotu nian.
“Estrada liga suku Uaimori ne’e ita hotu nian preokupasaun ho klíma udan agora daudaun ne’e sai preokupasaun. Estrada liga ba suku Uaimori ne’e, iha tinan 2016, reabilita tiha ona maibé ninia prosesu parte nasionál mak responsável. Ne’ebé, iha tempu badak, vise MOP sei ba direta vizita projetu sira-ne’e, atu empreza sira-ne’ebé kaer obra estrda ba suku Uaimori aselera servisu ne’e hodi fasilita movimentu sira. Tan ne’e, ita hein bainhira mak vise-MOP ba vizita direta servisu sira-ne’e,” nia dehan.
Suku Uaimori iha munisípiu Vikeke ne’e iha aldeia neen (6) mak hanesan aldeia Lulei, Me-Uai, Uaibubo, Uatulesu, Uma-Bo’o, Uma-Liurai ho totál abitante hamutuk 1.200.
Jornalista : Vitorino Lopes da Costa
Editór : Cancio Ximenes
