OEKUSI, 20 Marsu 2025 (TATOLI) – Autoridade Rejiaun Administrativu Espesiál Oekusi Ambeno (RAEOA) liuhusi Diretór Diresaun Rejionál Infraestrutura (DRI), Remigío Nuno Sila, klarifika katak plaka inaugurasaun iha ponte Noefefan ne’e sobu husi ema deskoñesidu no to’o agora seidauk deteta autór ne’ebé komete prátika iresponsabilidade ne’e.
Notísia relevante:Ponte Noefefan Halakon Populasaun 3600 Nia Izolamentu
Ponte Noefefan ne’e lokaliza iha suku Lifau, sub-rejiaun Pante Makasar, ne’ebe antes ne’e konstrui iha 2015 husi kompañia internasionál Adhi Karya ho valór kontratu millaun $17,5 no inaugura iha 2017 husi Prezidente Repúblika, Francisco Guterres ‘Lú-olo’.
Plaka ne’ebé estragu ne’e iha laran hakerek “Ponte Noefefan inaugurada no dia 10 de Junho 2017, Mais acessibilidade ao dezenvolvimentu” ne’ebé asina husi Prezidente Repúblika, Fransisco Guterres ‘Lu-Olo’ no Prezidente Autoridade RAEOA no ZEESM TL, Marí Bin Amude Alkatiri.
“Ami ba observa to’o fatin ne’e no husi Obra públika mós konsulta ona ho xefe suku Lifau, tanba nia área, nune’e ami koordena malu haree no deteta katak ema deskuñesidu mak estraga ka sobu. Daudaun ne’e ita hein informasaun husi autoridade suku Lifau karik hetan ema balun mak estraga entaun sei prosesa nia atu resposabiliza kona-ba nia-aktu ne’ebé nia prátika,” Remigío Nuno Sila, dehan iha Oekusi, ohin.
Nune’e, nia rejeita informasaun sira ne’ebe antes ne’e espalla iha rede sosial katak autoridade RAEOA mak hasai Plaka iha ponte Noefefan ne’e la loos.
Notísia relevante:Lú-Olo Sei Inaugura Ponte Noefefan
Daudaun ne’e, nia dehan Autoridade RAEOA liuhusi DRI seidauk iha planu atu hadi’a tanba presiza hetan informasaun ofisiál. Tanba liuhusi verifikasaun ne’ebé halo katak letra sira-ne’ebé hakerek iha plaka ne’e balun uza kola (lem) de’it, la’ós uza simentu.
“Atu hadi’a ou la’e ne’e depende mós tanba buat hotu-hotu sei liuhusi planu orsamentu ne’ebé karik iha posibilidade tinan oin bele hadi’a tanba ponte ne’e konstrui husi lideransa anteriór sira,” nia hateten.
Iha biban ketaXefe Suku Lifau, Delfino Sole, rekoñese ema deskoñesidu mak estraga plaka ne’e, nune’e parte autoridade komunitáriu Lifau servisu hamutuk ho Ofisiál Polísia Suku (OPS) kontinua buka tuir ema iresponsabilidade ne’e.
“Foin daudaun obra públika mai husu ha’u, depois ha’u husu tuir no aviza ba komunidade karik hetan ema ruma mak estraga obra ne’e presiza fó hatene atu prosesa, maibé to’o agora seidauk iha informasaun ruma, depois fatin ne’e mós públiku ema barak mai vizita hasai letratu, entaun susar atu deteta se mak estraga plaka ne’e”, nia afirma.
Maibé, Xefe suku ne’e promete katak Autoridade lokál iha suku Lifau hamutuk ho Ofisiál Poísia Suku (OPS) no komunidade sira kontinua buka tuir liuhusi rekolla informasaun, bainhira hetan sei relata mós ba Komandu PNTL Oekusi atu halo detensaun.
Notísia relevante:Ponte Noefefan Fasilita Ona Sirkulasaun Komunidade Oe-Cusse
Jornalista: Abílio Elo Nini
Editór: Florencio Miranda Ximenes
