VIKEKE, 20 Marsu 2025 (TATOLI)—Xefe Departamentu Reprezentante Territoriál Servisu Agrikultura munisipiu Vikeke, Julio Pinto Ribeiro, infoma guarda floresta iha munisípiu Vikeke na’in-15 daudaun ne’e ativa fila-fali hala’o sira-nia servisu hodi kontrola ema tesi ai ilegál.
Notísia Relevante: Guarda Florestál Vikeke defisil kontrola ema tesi ai ilegál
“Foin lalais ne’e (Marsu), Guarda Floresta no tékniku hamutuk na’in-15, asina fali ona kontratu, hafoin ramata kontratu servisu ramata iha 31 dezembru 2024. Nune’e, agora daudaun sira halo fali servisu hodi halo kontrola ema tesi ai ilegal iha munisípiu Vikeke,” Julio Pinto Ribeiro hateten ba Agéncia Tatoli iha Beloi, ohin.
Nia relata, Guarda Florestál hamutuk na’in-14 maibé na’in ida (1) labele kontonua asina kontratu tanba kondisaun moras, nune’e Guarda Floresta na’in-13 no tékniku na’in-rua (2) mak asina kontratu.
“Ita-nia Guarda Floresta ida (1) mak la kontinua asina kontratu tanba kondisaun moras. Ha’u-nia hakarak ne’e asina hotu hodi koloka fali iha administrasaun, maibé nasionál foti desizaun ne’ebé ha’u labele halo buat ruma. Durante husi fulan-Janeiru to’o Fevereira, ita-nia Guarda Floresta no tékniku sira la asina kontratu maibé sira nu’udar timoroan sira apoiu servisu voluntáriu hodi kontrola ita-nia ai-horis sira iha munisípiu Vikeke,” nia dehan.
Nune’e, nia dehan, rekursu ne’ebé daudaun iha maske númuru kiik maibé bele halo kontrolu fauna no flora sira iha munisípiu Vikeke.
Aleinde ne’e, nia aprezenta, Departamentu Reprezentante Territoriál Servisu Agrikultura munisípiu Vikeke enfrenta transporte karreta hodi apoiu servisu ba distribuisaun ai-oan ba komunidade ne’ebé presiza atu kuda ai-oan iha sira-nia kintál.
“Dezafiu ne’ebé ami hasoru mak karreta, ami iha viveiru ai-oan maibé ami laiha transporte hodi fasilita transporta ai-oan ba komunidade agrikultór sira iha Vikeke. Dezafiu ne’e ami hato’o beibeik ona maibé seidauk iha resposta,” nia dehan.
Tuir dadús, funsionáriu servisu iha Departamentu Reprezentante Territoriál Servisu Agrikultura munisípiu Vikeke totál hamutuk na‘in-19 ne’ebé kompostu husi funsionáriu permanente hamutuk na‘in-neen (6), kontratu na’in-15 kompostu husi Guarda Floresta na’in-13 no tékniku na’in-rua (2).
Jornalista : Vitorino Lopes da Costa
Editór : Cancio Ximenes
