BOBONARU, 20 Marsu 2025 (TATOLI)—Negosiante sira husu no rekomenda ba Autoridade Munisípál Bobonaru (AMB) atu tau iha planu orsamentu tinan 2026 hodi rezolve kondisaun merkadu iha postu administrativu Bobonaru liuhusi Projetu Planu Dezembolvimentu Integradu Munisipál (PDIM), tanba kondisaun Infraestrutrura atuál aat hotu ona no laiha espasu ba negosiante sira atu halo atividade negósiu.
Notísia Relevante: Merkadu Soso Maliana nakonu ho duut
Negosiante Filomena Lopes de Jesús hateten, durante ne’e sira la halo atividade negósiu kada loron uma merkadu ne’ebé Governu konstrui iha tinan hirak liuba ninia kondisaun fiziku nakfera no ai-riin mós halis hotu ona.
Nia dehan, problema ne’e líder komunitária sira husi mandatu sesante no atuál hato’o beibeik liuhusi enkontru Konsellu Koordenasaun Munisipál (CCM, sigla Portugués) kada tinan maibé to’o ágora laiha rezultadu tanba la pasa.
“Ami husu ba ita-nia na’i-ulun sira favór ida haree netik ami-nia merkadu ne’e, halo foun tiha para ami bele faan loro-loron. Se uma ne’e mak hanesan ne’e de’it, ami tauk la faan ida, tanba anin boot ka udan mai agora bele ameasa ba ami-nia vida. Uma ne’e nia laran sira-ne’e nakfera hotu ona, ne’e mak kada loron sábadu mak ami faan. Loron bain-leet ne’e, ami la mai ida, maibé sira ida hela besik merkadu ne’e mak faan,” Nia informa ba Agência Tatoli iha Bobonaro villa, kinta ne’e.
Negosiante Benjamín Maia reforsa argumenta ne’e bainhira autoridade Bobonaru iha planu atu halo konstrusaun foun, di’ak-liu muda ba fatin seluk tanba merkadu atuál ne’e kloot no laiha espasu ba atividade negósiu.
Tuir nia, fatin atuál merkadu ne’e mós la seguru ona tanba estrutura rai la metin tanba kauza husi erosaun.
“Merkadu nia kondisaun mak hanesan ita haree dadaun ne’e, nini lolon, meza sira nakfera hotu tanba iha tinan hirak liuba akontese rai-halai iha parte kraik ne’e, maibé agora ami sei faan. Iha ne’e, baibain bazar ne’e kada sábadu ne’e rame loos, maibé fatin la to’o be sira balun husi parte Karabau, Hauba, Marobo sira ne’e, mai faan de’it iha estrada laran. Motorista ho kareeta tama la di’ak tanba ema la’o ba nakonu Estrada ne’e. Ida-ne’e mak ami-nia problema. Karik bele, ami husu atu muda tiha merkadu ba rai-luan uituan, nune’e ami faan livre, kaereta ho motorizada mós la’o ba-mai ho di’ak,” nia dehan.
Ba asuntu ne’e, jornalista Tatoli tenta komfirma ho diretór Servisu Munisipál Jestaun Merkadu Autoridade Munisípiu Bobonaru, Paulo dos Santos, maibé la konsege tanba laiha fatin.
Enkuantu merkadu ne’e iha loron bazar kada sábadu ne’ebé akumula negosiante sira husi suku 18 ne’ebé pretense ba postu administrativu Bobonaru.
Notísia Relevante: Merkadu Mau-Mali seidauk funsiona atu negosiante sira hala’o atividade negósiu
Jornalista : Sergio da Cruz
Editór : Cancio Ximenes
