DILI, 20 Marsu 2025 (TATOLI)–Supremu Tribunál Judisiál (STJ) aseita rekursu ne’ebé aprezenta husi Defeza Arnolfo Teves Jr, Advogadu Privadu, José Ximenes, iha Dezembru tinan kotuk hodi solisita Supremu Tribunál Justisa labele halo estradisaun ba nia kliente hodi haruka filafali bá nia nasaun orijen, Filipina.
Hafoin Supremu Tribunál Justisa halo tiha análize ba rekursu referidu, nune’e Supremu Tribunál Justisa, kinta ne’e, liuhusi juíz plenáriu na’in-tolu, Maria Natércia Gusmão Pereira, António Helder Viana do Carmo, Edite Palmira dos Reis, deside indefere pedidu estradisaun ne’ebé aprezenta husi Governu Filipina mai Govenu Timor-Leste atu halo estradisaun ba Teves.
Notísia relevante: STJ kontinua halo analiza rekursu estradisaun Arnolfo
Desizaun Supremu Tribunál Justisa nian ne’e bazeia ba artigu 35 husi Konstituisaun RDTL kona-ba estradisaun no espulsaun iha númeru datoluk ne’ebé hateten, labele iha estradisaun tan krime ida, bainhira Estadu ne’ebé husu estradisaun bele fó kastigu mate-kotu ka kastigu to’o mate, ka bainhira iha tada nanis katak atu iha tortura ka tratamentu aat degradante ba ema ne’ebé atu hetan estradisaun.
“Iha desizaun ne’e, Tribunál Rekursu bazeia ba artigu 35 númeru 3 husi Konstituisaun RDTL, indefere pedidu estradisaun. Plenáriu husi juíz Tribunál Rekursu delibera unanimidade tuir fundamentu artigu 35 númeru 3 iha Konstituisaun RDTL, hodi rekuza pedidu estradisaun ba Arnolfo Alipit Teves Junior,” sita husi akordaun Supremu Tribunál Rekursu ne’ebé Tatoli asesu.
Rekorda fali katak iha loron 15 Dezembru 2024, defeza husi Arnolfo Teves Jr, Advogadu Privadu, José Ximenes, hatama rekursu bá Supremu Tribunál Justisa hodi husu Supremu Tribunál Justisa labele halo estradisaun ba Arnolfo Teves Jr.
Jornalista: Natalino Costa
Editór: Xisto Freitas da Piedade
