DILI, 15 janeiru 2025 (TATOLI)–Prezidente Tribunál Rekursu, Deolindo dos Santos, informa Supremu Tribunál Justisa (STJ) daudaun ne’e kontinua halo analiza ba pedidu rekursu Ministériu Públiku (MP) hodi halo estradisaun ba Arnolfo Teves Jr hodi haruka filafali ba nia nasaun orijin Filipina.
“Iha hela Tribunál Rekursu, Prezidente Tribunál Rekursu hanesan juís, entaun Prezidente labele ko’alia buat ne’ebé juís atu deside, entaun labele antesipa desizaun sira ne’ebé atu foti,” Prezidente Tribunál Rekursu informa ba jornalista sira iha resintu Parlamentu Nasionál (PN), kuarta ne’e.
Antes ne’e, Advogadu Privadu José Ximenes, hateten, MP mantein nia pozisaun hodi husu ba STJ hodi halo estradisaun ba Arnolfo Teves Jr hodi haruka filafali ba nia nasaun orijen Filipina.
“Ita-boot sira hatene mosu nulilidade iha primeiru julgamentu ba produsaun prova, tanba ne’e ita halo filafali re-julgamentu ba kazu, ha’u-nia kliente iha loron 22, to’o loron 30 outubru foin daudaun ne’e, haree filafali produsaun prova sira liuhusi ne’e ita rona fali testamuña sira,” nia akresenta.
Notísia relevante : Ministériu Públiku mantein pozisaun husu Supremu Tribunál halo estradisaun ba Arnolfo
Nia dehan, iha rejulamentu ne’e MP mantein ho nia alegasaun antes ne’e hodi husu ba STJ hasai desizaun hodi halo estradisaun ba fujitivu Arnolfo Jr, tanba bazeia ba faktu sira ne’ebé durante iha julgamentu provadu katak Arnolfo Teves Jr komete krime iha nia nasaun orijen.
“Sira-nia pedidu husu atu estradita tanba dehan Filipina iha boa fé,” nia tenik.
Advogadu husu STJ atu rejeita pedidu MP ne’ebé atu halo estradisaun ba nia kliente Arnolfo Jr.
Antigu Prokuradór Jerál Repúblika salienta, sei kontesta alegasaun husi MP tanba tuir ita-nia Konstituisaun RDTL artigu 35 númeru 2 laiha fatin atu estradita Teves filafali ba nia rai orijen Filipina.
“Argumentu ne’ebé ami iha mak Filipina nia Konstituisaun sei kontinua rekoñese pena morte, Timor-Leste la rekoñese pena morte, signifika katak Timor-Leste labele admite hanesan país ida ne’ebé respeita vida umana, artigu 29 númeru 3 artigu 35 númeru 3 hanesan país ne’ebé respeita vida umana. Ita-nia Konstituisaun la admite halo estradisaun ba kualker sidadaun ne’ebé iha nia país sei koñese pena morte,” nia hato’o.
Jornalista : Nelson de Sousa
Editora : Julia Chatarina