BOBONARU, 19 Maiu 2026 (TATOLI) – Administradór Parókia Santa Krús Maliana, Pe. Pedro Canísio Maia, iha selebrasaun misa agradesimentu ba Loron Restaurasaun Independénsia Timor-Leste ba-24 hateten, restaurasaun ida-ne’e la’ós de’it lori povu atu lembra istória luta, maibé mós atu restaura no prezerva identidade nasaun nian, liuliu lia-materna no kultura sira ne’ebé hahoris iha rai ida-ne’e.
Saserdote ne’e manifesta preokupasaun ida-ne’e, tanba daudaun labarik barak la uza ona lia-materna sira iha vida loroloron no la konsidera ona valór kulturál ne’ebé nia impaktu mai husi modernizasaun no mundansa ba vida sosiál.
“Ita luta atu orienta ita nia-an rasik, maibé dalabarak ita-nia lia-materna sira kuaze atu lakon daudaun. Ki’ikoan sira moris mai dehan ‘’Mloi tai Mloi ne’e la’e ona. Sira dehan de’it di’ak ka la’e, ita-nia uma lisan sira halo ona ho kalen, ai-riin sira halo ona ho simentu. Ita lahatene bainhira mak ai-riin ida-ne’e aat, nune’e ema bele ko’alia kona-ba lisan atu ba tau ai-riin ne’e mós prosesu”, nia hateten iha nia omília ih igreja Pró-Katedrál Maliana, ohin.
Bibi-atan ne’e mós hateten katak independénsia Timor-Leste la’ós rezultadu husi buat ne’ebé ema fó de’it iha bandeza, maibé husi luta, sakrifísiu, no unidade povu tomak nian hasoru sofrimentu boot, inklui balun mate tanba bala-musan, hamlaha no trauma.
Iha Loron Restaurasaun Independénsia tinan ne’e, amu-lulik ne’e bolu povu hotu nia atensaun atu hametin rekonsiliasaun no fó perdua malu iha fatin serbisu no komunidade, liuliu garante unidade nasionál.
“Sala karik ko’alia ba malu ho liafuan mamar, maibé kanek ida-ne’e sei la rezolve kuandu ita laiha rekonsiliasaun. Ita ne’e rai ida-ne’e mak ko’us ita, rai ida-ne’e mak hahoris ita, rai-ida ne’e mak fó matenek no buras mai ita. Tanba ne’e, ita ida de’it, rai ida de’it, uma-lisan ida de’it , avó ida de’it”, nia hato’o.
Iha misa ne’e, Vigáriu Parókia Maliana, Pe. Fernando Cardoso, mós hato’o parabéns ba povu Timor-Leste tanba selebra Restaurasaun Independénsia ba da-24.
Nia argumenta katak hanesan ema ida karik nasaun ne’e tama ona ba idade joven. Tanba ne’e, tema ba selebrasaun tinan ida-ne’e “Hamutuk Ita sei Harii Pátria ne’ebé Justa, Inkluziva no Reziliente liután”, importante tebes atu hametin unidade no respeitu ba diversidade iha Timor-Leste.
“Unidade moris husi diversidade no respeitu malu. Ita presiza fó liman ba malu atu konstrui nasaun ida ne’ebé forte no sustentavel”, Pe. Fernando hato’o.
Misa agresimentu ne’e partisipa husi Prezidente Autoridade Munisípiu Bobonaru, Autoridade Seguransa no Defeza, veteranu, funsionáriu, estudante no komunidade.
Notísia relevante: Restaurasaun Independénsia ba Dala-24: PAM Dili husu povu kontribui ba dezenvolvimentu nasionál
Jornalista: Sergio da Cruz
Editora: Maria Auxiliadora
