KOVALIMA, 21 Marsu 2025 (TATOLI) – Komunidade iha Postu administrativu Fatululik, munisípiu Kovalima, daudaun ne’e, difisil atu halo movimentu lori sira-nia produtu lokál ba iha merkadu, tanba kondisaun estrada nakonu ho tahu.
“Ita hatene daudaun ne’e tempu udan nune’e difisil atu halo movimentu, nune’e halo ami preokupa kona-ba kondisaun estrada husi munisípiu liga mai iha Postu administrativu Fatululik, ami labele lori ami-nia produtu fa’an iha merkadu”, Komunidade Elda de Jesus, informa liuhusi telefoni, ohin.
Komunidade Postu administrativu Fatululik iha nia produtu lokál mak hanesan lis, koto, kami, fore-keli, fore-rai, kafé, ortikultura no seluktan labele lori ba merkadu tanba haree ba kondisaun estrada ne’ebé grave.
Nune’e husu ba Ministériu relevante liliu Servisu munisipál obra públiku (SMOP) atu haree kondisaun estrada ne’ebé mak daudaun ne’e difikulta komunidade atu halo movimentu lori nia produtu fa’an iha merkadu kapitál munisípiu.
“Ho kondisaun Estrada ne’ebé mak aat grave maske ami iha produtu maibé difisil ba ami lori ami-nia produtu ba fa’an iha merkadu hodi hetan osan atu sustenta ami-nia família”, nia dehan.
Iha sorin seluk, Xefe aldeia Holba, Suku Taroman, Marcelino Antunes reforsa katak, kondisaun estrada husi postu administrativu liga ba kapitál munisípiu grave tanba iha tempu udan estrada nakonu ho tahu no nakfila ba mota.
“Ita hatene daudaun ne’e tempu udan nune’e komunidade sira difisil atu halo movimentu, tanba transporte públiku hanesan Anguna la halo movimentu tanba haree ba kondisaun estrada”, autoridade lokál ne’e reiteira.
Kona-ba kondisaun estrada, Administradór Postu administrativu Fatululik, Elias da Cruz rekoñese kona-ba kondisaun estrada iha Fatululik ne’e grave nune’e difisil atu halo movimentu.
“Ita hatene kondisaun estrada iha postu Fatululik iha aldeia ualu ne’ebé estrada iha aldeia lima ami konsidera estrada rurál no iha aldeia tolu ami konsidera estrada nasionál”, nia esplika.
Líder postu ne’e dehan, daudaun ne’e estrada iha aldeia lima empreza rua mak atu halo konstrusaun, estrada liga mai iha suku Taroman ho Kilometru10 ne’ebé empreza balun mak manan ona konkursu públiku.
“Kondisaun estrada iha Fatululik nia prosesu daudaun ne’e la’o hela nune’e empreza ida mak seidauk implementa projetu iha postu Fatululik maibé daudaun ne’e empreza rua la’o hela”, nia informa.
Tuir dadus, Postu administrativu Fatululik iha nia suku sira hanesan Suku Fatululik iha nia aldeia Beco, Beidasi no Aitoun no Suku Taroman ho nia aldeia sira hanesan Lia-Na’in, Taroman, Makous, Fatuloro, Holba; totál populasaun 3.258.
Jornalista: Celestina Teles
Editór: Rafael Ximenes de A. Belo
