BOBONARU, 21 Marsu 2025 (TATOLI)—Komunidade sira husi munisípiu Bobonaru preukupa ho oráriu produsaun pasaporte komum iha Servisu Konservatóriu Rejistu Notariadu, Munisípiu Bobonaru tanba la halo atandimentu kada loron.
Reprezentante komunidade Bobonaro, Juvinál Fernandes, konsidera sistema ne’e la’o lentu nune’e husu Diresaun Jerál Servisu Konservatóriu Rejistu Notariadu atu buka solusaun hodi rezolve problema ne’e.
Notísia Relevante: Atendimentu pasaporte iha Bobonaro sei hala’o iha kada kuarta
“Ha’u lori ha’u-nia oan mai trata pasaporte loron ida nian selu $100 ne’e, duoumentu hatama iha semana kotuk to’o agora seidauk hasai foto, tanba sira dehan husi Nasionál orienta mak foin bele bolu mai hasai foto, ida-ne’e mak ami preokupa no ida hanesan ne’e ita presiza urjente ne’e ladi’ak. Ami hela iha foho ne’e tenke gasta tempu ba-mai dala-rua ka tolu, tempu udan hanesan ne’e dalan mós ladi’ak tán. Ne’ebé, ha’u-nia hanoin ita-nia Estadu ho Governu, tenke rezolve lalais, loke hanesan uluk loro-loron ne’e,” nia informa ba Agência Tatoli iha Holsa, sesta ne’e.
Komunidade Holsa, Antonio Bello Soares, reforsa Governu tenke rezolve problema ne’e ho sériu tanba fatin atendementu pasaporte iha DMSKRN Bobonaru ida de’it, entaun problema ne’e mak kauza sidadaun sira forma naruk no sena malu.
“Se bele loke fatin rua, ida simu dokumentu no ida parte hasai foto ho asina nian para bele la’is. Se lae, ema barak sena malú iha li’ur, ema ida de’it mak atende iha laran, automatikamente loron ida labele atende hotu, balu tenke hein to’o loron rua to’o semana tan. Ida-ne’e ha’u haree ho matan, tanba ne’e mak Ema forma sena malu ne’e, entaun Governu presiza aumenta tan ema para servisu ne’e la’is,” nia hateten.
Entretantu, Diretór Servisu Munisipál Konservatóriu Rejistu Notariadu Munisípiu Bobonaru, Marciano Mali Loe, klarifika provizóriu atendementu produsaun pasaporte depende ba oráriu husi Diresaun jerál.
“Atendementu normál hela, ita simu tiha dokumentu mak foin termina fali oráriu hasai pasaporte, ita la’o tuir de’it oráriu husi Nasional de’it. Dalaruma ita atende dala neen ou hitu ba fulan ida, ne’e problema CISCO. Agora, ita hein akizisaun ba CISCO foun ninia prosesu iha aprovizionamientu hela,” Marciano informa ba Agência Tatoli liuhusi WhatsApp (WA).
Notísia Relevante: Notariadu Bobonaro atende pasaporte 20 kada loron
Jornalista : Sergio da Cruz
Editór : Cancio Ximenes
