BOBONARO, 20 janeiru 2025 (TATOLI)—Diresaun Servisu Konservatoriu Rejistu Notariadu (DSKRN) Munisípiu Bobonaro simu orientasaun husi Diresaun Jerál halo mudansa oráriu atendimentu pasaporte, hodi hala’o iha kada kuarta-feira iha kada semana tanba problema iha ekipamentu Sisco nasionál.
Diretór Servisu Rejistu Notariadu Munisípiu Bobonaro, Marciano Mali Loe, hateten atendimentu ne’e sei hala’o tuir oras serbisu hahú husi dadeer tuku 08h300 to’o tuku 12h00 meudia no sei kontinua fali iha tuku 02h00 to’o tuku 17h30 lorokraik.
Notísia Relevante: Notariadu Bobonaro reativa atendimentu pasaporte
“Ita simu orientasaun husi nasionál katak ita atende iha munisípiu ne’e semana ida dala ida de’it, tanba limitasaun husi Sisco. Ne’ebé, ita Munisípiu Bobonaro atende iha loron kuarta de’it, ita simu nia dukumentu sira mai hatama ne’e laiha limitasaun. Ezemplu, ita simu dukumentu iha kinta ne’e hira, depois iha kuarta ne’e ita atu simu dukumentu to’o 50 mós laiha buat ida. Karik, kuarta mak ita konsege atende hotu ita bele atende, karik labele ita kontinua fali tuir oráriu nasionál fó mai ne’e,” Nia hateten ba Agência Tatoli iha nia kna’ar fatin, segunda ne’e
Diretór ne’e husu ba komunidade hotu iha munisípiu Bobonaro atu pasiénsia uitoan tanba daudaun ne’e parte aprovizionamientu halo hela prosesu akizisaun ba ekipamentu ne’e.
“Tempu badak mak prosesu aprovizionamentu la’o ho di’ak. Ita-nia atendimentu pasaporte sei la’o normál fila-fali. Ita atende husi segunda to’o kinta, prosesu hansan baibain iha oras serbisu nian,” nia dehan.
Reprezentante estudante, Rivaldo de Jesús, hato’o nia preokupasaum no husu ba Governu Konstitusionál da-sia (IX) atu aselera prosesu akizisaun ba mákina ne’e, nune’e bele fasilita sidadaun sira asesu pasaporte ho fasíl no lalais.
“Ami presiza tebes Pasaporte, tanba agora ami ba kursu Lian Korea mós ema presiza Pasaporte. Se atende semana ida dala ida de’it, ne’e ami soe tempu barak-liu, bele prezudika ami labele tama aula. Tanba, kuarta ne’e, ami mai trata no simu kedas ne’e di’ak. Se la konsege, ami konta hein beibeik, entaun ami husu nai-ulun sira haree rezolve lalais kestaun ne’e,” nia hateten.
Entretantu, iha 2024 ne’e, Diresaun Servisu Rejistu Notariadu Munisípiu Bobonaro konsege halibur reseita hamutuk rihun $51,275 liuhusi atendimentu Pasaporte. Orsamentu ne’e kontribui husi sidadaun na’in-969 ne’ebé kompostu husi mane ema na’in-532 no feto na’in-437.
Notísia Relevante : Mákina Pasaporte ida avaria hahú funsiona normál
Jornalista : Sergio da Cruz
Editór : Cancio Ximenes
