BOBONARO, 02 fevereiru 2024 (TATOLI) – Diresaun Servisu Munisipál Konservatóriu Rejistu Notariadu (DSMCRN) Munisípiu Bobonaro, hahú reativa atendimentu ba komunidade no estudante sira-ne’ebé atu trata foun no renova pasaporte.
Diretór Servisu Munisipál Konservatóriu Rejistu Notariadu Munisípiu Bobonaro, Marciano Mali Loe, hateten prosesu atendimentu hahú kedas iha segunda (29/01) ne’e no kada loron atende de’it ema na’in-30.
“Ami simu orientasaun hosi nasionál mak foin halo ajendamentu online, maibé munisípiu seidauk, ne’ebé ami simu orientasaun agora loron ida atende ema na’in-30, ami bele simu liu hosi ida-ne’e, mas ami sei halo jestaun loron ida atende 30 depois sira tuir fali mai sei kontinua ba aban,” nia informa bá jornalista sira iha Maliana, kinta ne’e.
Nia hatutan, atendimentu ne’e bá prosesu loron 10 nian de’it, enkuantu prosesu loron ida to’o tolu só bele realiza iha nasionál.
Nia husu ba komunidade sira atu prepara didi’ak dokumentu sira hanesan Billete Identidade orijinál.
Komunidade Maliana, Felisberto Perreira, sente kontente no agradese ba governu tanba bele esforsu rezolve ona problema kaderneta pasaporte.
“Ami kontente maske durante ne’e hein kleur, pasaporte ne’e dokumentu importante tebes tanba bele fasilita ita-nia viajen ba nasaun seluk no servisu iha ema-nia rai,” nia katak.
tuir dadus ne’ebé hahú reativa atendimentu iha segunda ne’e ema na’in 200-resin mak submete ona dukumentu no hosi númeru ne’e na’in 100-resin mak iha ona prosesu nia laran.
Notísia relevante: Bobonaro-oan husu MJ rezolve problema kaderneta pasaporte
Jornalista: Sérgio da Cruz
Editór: Evaristo Soares Martins
