BOBONARO, 08 janeiru 2024 (TATOLI)-Komunidade, estudante liuliu joven hosi iha munisípiu Bobonaro husu no ezije ba Ministériu Justisa (MJ) atu rezolve lalais problema kaderneta pasaporte ne’ebé dadaun ne’e stock out hela.
“Dezde Natál hotu ne’e kedas ami mai taka hela de’it, ami rona ba dehan hotu tiha ona, ne’ebé ha’u nu’udar joven husu ba Governu ida-ne’e urus lalais kaderneta pasaporte ne’e, atu tempu badak ami bele ba hasai, hodi fasilita ami ba eskola no maluk seluk bele ba servisu iha Korea, Austrália no Inglaterra,” Komunidade postu Bobonaro, Mariano Freitas, informa ba Tatoli, iha Maliana, segunda ne’e.
Estudante ne’e akresenta, durante re-ativa atendimentu pasaporte, nia la konsege submete dokumentu, tanba sei hein rezultadu finál ezame nasionál 2023.
“Ha’u eskola iha Dili, durante ne’e la mai urus tanba foin lalais ne’e mak tamat SMA (remata Sekundária), liutiha mak agora ha’u foin mai trata pasaporte atu ba eskola iha Indonézia, ne’e mak ami laiha hela de’it,” nia tenik.
Delfina Perreira nu’udar joven, hatama ona dokumentu iha fulan-dezembru 2023, maibé to’o agora seidauk hetan pasaporte.
“Ha’u la hatene ne’e ami hein to’o bainhira tán mak kaderneta pasaporte bele mai, sé situasaun hanesan ne’e beibeik, bele impede ami-nia moris, tanba ami trata pasaporte ne’e atu ba servisu iha rai-li’ur, sé bele governu prosesa lalais,” nia fó hanoin.
Diretór Servisu Munisipál Konservatóriu Rejistu Notariadu Munisípiu Bobonaro, Marciano Mali Loe, esklarese iha loron 18 fulan-dezembru 2023 ne’e kedas diresaun Jerál Rejistu Notaridu orienta supende atividade atendimentu pasaporte.
“Ho razaun tanba arkivu dokumentu iha nasionál ne’e barak tebes, entaun ami la halo atendimentu normál, depois Natál hotu mai tinan foun dia 02 ami hetan imformasaun hosi nasionál katak ita labele halo atendimentu tanba estoke pasporte hotu, entaun ami mós taka avizu bazea ba despaxu hosi nasionál,” Diretór ne’e konfirma.
Nia observa, daudaun ne’e komunidade feto-mane, estudante sira kontinua hakbesik-aan ba edifísiu Rejistu Notariadu Munisípiu Bobonaro hodi husu informasaun kona-bá kaderneta pasaporte.
“Ami sempre fó informasaun ba sira, karik iha ami sei taka fila-fali avizu, ne’ebé ha’u husu komunidade sira atu hein pasiénsia oituan, karik kaderneta iha sira nasionál sei fó avizu mai hodi loke atendimentu hanesan bainbain, tanba agora ita-nia estoke hotu,” nia dehan.
Enkuantu hahú hosi loron 22 fulan novembru to’o dezembru tinan 2023 liubá, Ministériu Justisa liuhosi Diresaun Jerál Rejistu Notariadu konsege emite ona pasaporte ba sidadaun iha munisípiu Bobonaro na’in-879.
Jornalista: Sérgio da Cruz
Editór: Evaristo Soares Martins
