DILI, 21 Marsu 2025 (TATOLI)-Ministériu Obras Públikas (MOP) ho Fundu nasaun unida ba infánsia (UNICEF, sigla inglés) selebrasaun akordu foun apoiu finansiamentu millaun ida liu, ba implementasaun serbisu tinan-2025, iha ámbitu selebrasaun loron mundiál bee 2025 iha suku Hera, aldeia Sukaer-Laran, Postu administrativu Kristu Rei, munisípiu Dili, ohin.
Akordu ne’e ho durasaun tinan-lima, nu’udar kontinuasaun husi akordu anteriór, hodi apoiu finansiamentu prosesu implementasaun servisu ne’ebé MOP hala’o ba dezenvolvimentu nasaun nian. Akordu anuál sempre halo renovasaun kada tinan no ohin kompleta ona tinan lima.
“UNICEF nu’udar parseria MOP nian, ne’ebé kada tinan sempre ajuda. tinan ida-ne’e kompleta akordu ba tinan lima, signifika la’ós hotu ona, maibé sira sei halo planu kontinuasaun apoiu ba tinan lima mai tan”, Ministru Obras Públikas, Samuel Marçal, ba jornalista sira, iha entrevista, iha Hera, ohin.
Ministru akresenta tan, akordu ba tinan ida-ne’e sei foka liu ba iha bee no saneamentu nian, maibé téknikamente sira mós haree ba estudu mapamentu sira.
Iha fatin hanesan, Reprezentante adjuntu UNICEF Timor-Leste, Ainhoa Jaureguibeitia informa katak atividade asina akordu entre UNICEF no Ministériu Obras Públikas, ba Diresaun Nasionál Regulasaun Bee no Saneamentu (DNRAS) ne’e atu kontinua serbisu hamutuk iha tinan-2025 nian.
“Ida-ne’e atividade ne’ebé ami planu hamutuk ba parte rua atu halo konservasaun bee-matan sira iha komunidade nia leet, nune’e bele fornese bee ba komunidade sira ne’ebé infrenta problema”, nia dehan.
Husi kooperasaun ne’e, tuir nia, UNICEF halo avaliasaun ba implementasaun servisu lubuk ida mak la’o progresu hanesan, saneamentu, konservasaun bee no atualiza komunidade sira oinsá halo toilet iha kada uma-ka’in liuhusi programa La so’e foer boot arbiru (ALFA) no hatudu katak konsege munisípiu neen mak iha progresu hanesan Ainaro, Ermera, Bobonaro, Likísa, Manatutu no Aileu.
Tuir informasaun organizasaun internasionál UNICEF sei iha planu atu kontinua halo akordu no apoiu ba servisu bee no saneamentu ba tinan lima mai tan. Tanba servisu sira ne’e iha relasaun ho labarik sira-nia moris liga ba bee-moos.
Jornalista: Alexandra da Costa
Editór: Rafael Ximenes de A. Belo
