DILI, 21 Marsu 2025 (TATOLI)–Ministériu Solidariedade Sosiál no Inkluzaun (MSSI) simu doasaun hanesan livru, sasán halimar ba labarik sira, mákina suku roupa no laptop husi governu Xina, sesta ne’e iha salaun MSSI, Kaikoli.
Doasaun ne’ebé governu simu liuhusi embaixada Xina iha Timor-Leste mak livru istória ba labarik hamutuk 750, brinkedu alfabetu hamutuk 250, mákina suku roupa 35, laptop 20.
“Apoia ne’e rezultadu husi partisipasaun Vise-Ministra nian ne’ebé halo enkontru ho Xina iha tinan 2023”, informa Ministra Solidariedade Sosiál no Inkluzaun, Verónica das Dores.
Ministra dehan apresia ho apoiu ne’e no sei halo planu liuhusi dirasaun jerál protesaun sosiál, oinsá sobrevivente sira ne’ebé hela iha uma-mahon, feto no labarik sira bele utiliza.
Embaixadora Xina iha TL, Wang Wenli, dehan solidariedade sosiál no inkluzaun nu’udar ai-riin fundamentál ba estabilidade no dezenvolvimentu nasionál, ne’ebé sempre iha kompromisu atu hadi’a kondisaun moris grupu vulnerável sira-nia no promove ekidade sosiál no kreximentu inkluzivu.
Nia dehan, Federasaun Feto Xina nu’udar organizasaun feto boot liu iha Xina, dedika kleur ona atu proteje direitu no interese feto no labarik sira-nian, promove dezenvolvimentu feto nian, no envolve ativamente iha kooperasaun internasionál.
“Entaun doasaun ne’e marka kolaborasaun dahuluk entre Federasaun Feto Xina Tomak, Embaixada Xina iha Timor-Leste no Ministériu Solidariedade Sosiál no Inkluzaun. Ida-ne’e iha signifikadu boot. Liuhusi inisiativa ida ne’e, Xina hein katak fornesimentu sira ne’e sei ajuda labarik Timoroan sira asesu ba kondisaun aprendizajen ne’ebé di’ak liu, fó oportunidade empregu barak liután ba feto sira, no kontribui ba dezenvolvimentu sosiál nasaun nian”, Wang Wenli dehan.
Ekipa médiku Xinés nian dedikadu nafatin atu fornese servisu kuidadu saúde ho kualidade, peritu agríkola Xinés introdús ona ho ativu tékniku agrikultura avansadu sira hodi hasa’e produtividade agríkola, no iha edukasaun no kultura, Xina ajuda ona haburas talentu sira, hodi haburas ligasaun kle’an liu entre povu sira.
“Haree ba oin, Xina sei kontinua aprofunda kooperasaun ho Timor-Leste iha domíniu oioin hodi promove dezenvolvimentu ekonómiku no sosiál hodi hametin amizade entre ita-nia povu sira”, Wenli dehan tan.
Wang Wenli hatete, Embaixada Xina mós iha vontade atu hasa’e komunikasaun no kolaborasaun ho MSSI hodi avansa kooperasaun iha seguransa sosiál, formasaun profisionál, no empoderamentu feto. “Hamutuk, ita haka’as-an atu hadi’a kondisaun moris feto, labarik, no grupu vulneravel sira nian, hodi lori benefísiu ba ema barak liután iha Timor-Leste”.
Notísia relevante: Xina kontinua hatudu vontade apoia ba Timor-Leste nia dezenvolvimentu
Jornalista : Osória Marques
Editora : Rita Almeida
