DILI, 17 dezembru 2024—Vise-Ministru Negósiu Estranjeiru Repúblika Populár Xina, Sun Weidong hasoru malu ho Primeiru-Ministru (PM), Kay Rala Xanana Gusmão, hodi ko’alia kona-ba Xina nia apoiu ba dezenvolvimentu Timor-Leste liuhusi kooperasaun ne’ebé nasaun rua estabelese ona.
“Ministru Negósiu Estranjeiru Xina mai ko’alia kona-ba kooperasaun ho Timor-Leste. Ita agradese tebes membru Governu ida mai dala ida tan. Ami la diskute asuntu detallada, maibé fó hatene ba malu de’it. Sira mai atu afirma nafatin vontade hodi ajuda Timor-Leste iha dezenvolvimentu,” Xefe Governu hateten hafoin enkontru iha Gabinete Fronteira Marrítima, Palásiu Governu, tersa ne’e.
Iha sorin seluk, Vise-Ministru Negósiu Estranjeiru Repúblika Populár Xina, Sun Weidong, sente previlejiadu hodi hasoru malu ho Primeiru-Ministru atu re-afirma hikas kompromisu sira entre nasaun rua.
Xina ho Timor-Leste hanesan belun di’ak nomós parseiru ba kooperasaun, ne’ebé dezde kedan inísiu tinan 2002, Timor-Leste restaura ninia independénsia totál nu’udár Estadu Soberanu.
Notísia relevante : Governu Xina no UNICEF oferese fasilidade eskolár ba EBC Sérgio Viera de Melo
Sun Weidong dehan, tinan kotuk Xina onradu simu Primeiru-Ministru, ne‘ebé partisipa iha serimónia abertura Jogu Aziátiku ba dala 19 iha Hangzhou no Prezidente Xina, Xi Jinping realiza enkontru ida-ne’ebé susesu tebes ho Xanana Gusmão no konsege atualiza parseria estratéjiku ida-ne’ebé kompriensivu liu.
Nune’e, ho vizita Prezidente Repúblika, José Ramos Horta, iha inísiu tinan 2024, sai mós onra ida ba Xina liuhusi konkordánsia ida atu avansa hamutuk ba objetivu jerál.
“Husi ne’e oferese orientasaun estratéjiku ba nasaun rua hodi hametin liután relasaun ne’ebé foka ba área prinsipál sira mak hanesan indústria, infraestrutura no agrikultura, hodi hadi’a povu nia moris,” nia akresenta.
Objetivu prinsipál Sun Weidong nia vizita mai ne’e mak hakarak atu implementa liután konsensu líder sira-nian hodi promove kooperasaun iha prátika.
Enkontru ne’e akompaña mós husi Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Vise-Ministra Asuntu ASEAN, Milena Maria da Costa Rangel. Enkuantu, Vise-Ministru Sun Weidong akompaña hosi Embaixadora Xina iha TL, Wang Wenli.
Durante iha Timor-Letse, Sun Weidong sei hasoru malu mós ho membru Governu sira seluk hodi deskute detallada kona-ba asuntu konkretu kooperasaun nian.
Jornalista : Arminda Fonseca
Editora : Julia Chatarina
