DILI, 21 Marsu 2025 (TATOLI)–Banku Sentrál Timor-Leste (BCTL, sigla portugés) rejista traballadór timoroan sira iha Koreia do Sul, Austrália, Irlándia, Reinu Unidu, no seluk tan kontribui remesa (haruka osan) millaun $244,8 mai Timor-Leste, durante tinan 2024.
“Remesa osan ne’ebé tama husi ita-nia maluk sira ne’ebé serbisu iha rai-li’ur hamutuk millaun $244,8, ne’e remesa ne’ebé sira haruka, ida-ne’e reprezenta 14,5% husi Produtu Internu Brutu (PIB), ne’e termaksud boot,” Governadór BCTL, Helder Lopes, fó sai iha ámbitu lansa relatóriu dezempeñu ekonómiku Timor-Leste nia iha 2024, iha edifísiu Ministériu Finansa, Aitarak-laran, sesta ne’e.
Notísia relevante : Timoroan iha rai-li’ur kontribui remesa millaun $407 iha tinan 2023
Remesa rekollidu boot liu mai husi Reinu Unidu ho valór millaun $100, Austrália millaun $61, Koreia Súl millaun $44,8 no millaun $39 husi nasaun seluk.
Governadór kompara, remesa ne’ebé traballadór timoroan haruka fila iha tinan 2023 millaun $204,4 no iha tinan 2022 millaun $196.
Enkuantu, traballadór timoroan iha Reinu Unidu ida-idak ho nia responsabilidade individuál ne’ebé utiliza pasaporte Portugal.
Ba traballadór timoroan iha Koreia Súl no Austrália liuhusi akordu kooperasaun entre Sekretaria Estadu Formasaun Profisionál no Empregu (SEFOPE) no Governu rai rua ne’e desde tinan 2012.
Jornalista : Nelson de Sousa
Editora : Julia Chatarina
