DILI, 23 Marsu 2024 (TATOLI) – Papa Francisco bele alta ohin, 23 Marsu, husi Ospitál Gemelli, iha Roma, no filafali bá nia rezidénsia, iha Vatikanu, hafoin loron 38 nia internadu iha ospitál.
“Notísia di’ak ne’ebé mundu no ema hotu hein katak Santu Padre bele alta no filafali bá Santa Marta [iha Vatikanu]”, haktuir nota imprensa husi Vatikanu ne’ebé TATOLI asesu, ohin.
Liuhusi konferénsia imprensa, médiku Sergio Alfieri, doutór ne’ebé halo tratamentu ba Papa nia saúde haktuir iha momentu Santu Padre tama iha ospitál, iha loron 14 Fevereiru, katak Papa aprezenta insufisiénsia respiratória aguda tanba infesaun polimikrobiana, kauza husi vírus, baktéria no fungu.
Ho kondisaun ida-ne’e, tuir Alfieri, rezulta pneumonia bilaterál severa, ne’ebé ezije Santu Padre tenke hetan tratamentu farmakolójiku espesífiku.
Profesór ne’e mós hateten depoizde kondisaun klínika Papa nian ne’ebé kompleksu, iha semana rua ikus ne’e nia estadu saúde mantein estavel.
Nia salienta katak Papa presiza tempu pelu menus fulan rua ba nia rekuperasaun.
Iha Papa nia rekuperasaun ne’e ezije fizioterapia respiratória no motora, nomós ho apoiu oksijéniu loroloron no nafatin ho akompañamentu husi médiku.
“Papa kolabora durante halo tratamentu no, se mantein evolusaun pozitiva, bele retoma nia atividade iha tempu badak”, médiku ne’e dehan.
Papa ho idade 88 ne’e, antes alta no filafali bá Vatikanu, halo aparisaun (mosu) públika ba dahuluk iha janela Ospitál Gemelli, no iha oráriu Angelos nian iha domingu, saúda no fó bensaun ba sarani sira depoizde liu semana lima nia halo tratamentu iha ospitál.
Notísia relevante: Estadu saúde Papa Francisco aumenta di’ak no estavel
TATOLI
