VIKEKE, 24 marsu 2025 (TATOLI)—Ekipa téknika Eletricidade de Timor Leste, Empreza Públika (EDTL,E.P) munisípiu Vikeke halo ona manutensaun ba liña eletrisidade iha suku Ahik no Laline, ne’ebé avaria kuaze fulan-lima ona.
“Iha sabádu semana kotuk (22/03) ekipa EDTL, E.P husi munisípiu Vikeke dezloka mai ami-nia suku no apoiu husi komunidade mak ba manutensaun ba ahi eletrisidade ne’ebé ai monu iha ai-rin leten hodi rezulta fiu hetan estragu iha área Kamedar. Nune’e, ekipa téknika sira halo ona manutensaun no ahi eletrididade ba suku rua nian, daudaun lakan normál filafali, ami asesu ona kalan tolu,” Xefe suku Ahik, postu administrativu Lakluta, munisípiu Vikeke, Ercilio Soares, informa ba Agência Tatoli, iha postu Lakluta, segunda ne’e.
Notísia relevante : EDTL, E.P rekolla reseita millaun $58-resin durante tinan 2024
Autoridade suku ne’e haktuir, liña eletrisidade iha suku Ahik no Laline hahú la lakan iha Outubru 2024 to’o Marsu 2025, hafoin EDTL, E.P munisípiu Vikeke halo normaliza.
“Durante ahi eletrisidade la lakan sai dezafiu ba abitante sira husi suku rua iha tempu kalan balun tuur iha nakun no balun uza lamparina no sunu lilin. Ami esforsu husu EDTL, E.P nasionál no empreza responsável, maibé sira la konsege mai hadi’a. Ami husu agradese ba EDTL,E.P Vikeke ne’ebé konsege hadi’a ona ami-nia ahi eletrisidade ne’ebé la lakan durante fulan-lima nian laran,” nia akresenta.
Nia dehan, daudaun ne’e eletrisidade lakan fali ona hodi ajuda tebes negosiante sira ne’ebé uza jelera inklui estudante sira estuda iha tempu kalan.
“Ba oin maka ahi eletrisidadr avaria tan, ha’u hanoin EDTL, E.P tenke atende lalais hodi halo manutensaun, atu labele lori fulan barak nia laran mak halo manutensaun, tanba bele difikulta ita-nia abitante sira iha tempu kalan,” nia katak.
Tuir dadus, iha uma-kain 450 iha suku Ahik no uma-kain 155 iha suku Laline mak asesu ona eletrisidade.
Jornalista : Vitorino Lopes da Costa
Editora : Julia Chatarina
