VIKEKE, 24 marsu 2025 (TATOLI)—Empreza responsável hahú ona konstrusaun irrigasaun Logobere ne’ebé lokaliza iha suku Ossú de Cima, postu administrativu Ossu, munisípiu Vikeke.
“Konstrusaun ba irrigasaun Logobere hahú implementa hodi fornese bee ba natar Bakasi, atu agrikultór sira halo filafali sira-nia natar ne’ebé abandona durante tinan barak. Husi parte nasionál mak sei responsabiliza ba konstrusaun ne’e,” Diretór Servisu Ministériu Agrikultura Peska, Pekuária no Floresta (SMAPPF) munisípiu Vikeke, Olívio Freistas Soares, informa ba Agência Tatoli, iha postu Vikeke Vila, segunda ne’e.
Diretór ne’e iha espetativa, bainhira irrigasaun ne’e ramata maka agrikultór sira bele halo atividade agrikultura hodi hasa’e produsaun hare, tanba durante ne’e atividade iha natar iha parte Bakasi ladún la’o tanba irrigasaun a’at.
“Ita-nia esperansa bainhira irrigasaun ramata, sei benifisia ba ita-nia agrikultór sira atu sira bele halo filafali sira-nai natar ne’ebé abandona,” nia akresenta.
Notísia relevante : Udan boot estraga irrigasaun Osoria-Uaibilesa no Hae-Oli iha Uatukarbau
Iha fatin ketak, Xefe suku Ossu de Cima, Celestino M. de Carvalho, haktuir, durante ne’e natar Bakasi ho medida ektare 500-resin mak sai abandona kuaze tinan 11-resin, husi númeru ne’e ektare 10 mak agrikultór sira halo ativu, maibé barak mak laiha atividade tanba laiha bee.
“Nune’e, foin lalais ne’e empreza halo ona serbisu, maibé ha’u haree sira uza masa ba irrigasaun ne’ebé hapara tiha. Tanba ne’e, ha’u hapara, atu empreza Haberan Unipessoal, Lda tenke klarifika didi’ak lai ba natar na’in sira mak kontinua serbisu. Tanba ita hakarak konstrui irrigasaun ho kualidade di’ak atu ita-nia agrikultór sira uza ba tinan naruk,” nia hato’o.
Autoridade suku reforsa, bainhira gasta ona orsamentu tenke garante kualidade hodi uza irrigasaun ba tinan naruk.
“Irrigasaun mak uza masa bainhira buat ruma sama sei a’at no bee sei la distribui di’ak bá natar. Ha’u husu empreza mai enkontrui hamutuk ho autotidade no natar na’in sira mak foin serbisu fali,” nia katak.
Biban ne’e, nia rejeita informasaun ne’ebé Prezidente Autoridade Munisípiu Vikeke fó sai katak autoridade mak halo impedimentu ba serbisu husi tékniku empreza.
“Ne’e la loos. Ha’u mak hapara serbisu, la signifika impede serbisu totál, ha’u hakarak ne’e empreza halo lai enkontru ho ita-nia komunidade natar na’in sira hodi esplika kle’an lai, depois mak ita kontinua serbisu irrigasaun nian,” nia tenik.
Konstrusaun eskema irrigasaun Logobere, Ossu de Cima, munisípiu Vikeke ho montante $300.000 husi Orsamentu Jerál Estadu (OJE) 2025 ne’ebé konstrui husi empreza Haberan Unipessoal, Lda.
Irrigasaun referida sei benifisia ba abitanten suku Ossu de Cima ho totál populasaun 4263, kompostu husi aldeia hanesan Baca-Isi, Belas, Borala, Cai Uai Ho O, Liamida, Lugabuti, Uairio, Uma Ana Ico nomós suku viziñu sira.
Jornalista : Vitorino Lopes da Costa
Editora : Julia Chatarina
