VIKEKE, 19 Marsu 2025 (TATOLI)–Akontesementu udan boot, iha semane ne’e, mota estragu irrigasaun tolu (3) iha postu Uatukarbau, munisípiu Vikeke ne’ebé labele kanaliza bee ba natar.
Notísia Relevante: Servisu MAPPF Viqueque sei reabilita irrigasaun Uelafua-Futudu iha tinan ne’e
Xefe suku Bahatata, postu Uatukarbau, munisípiu Vikeke, Patrício Maria Pinto, hateten iha suku Bahatata ne’e irrigasaun rua mak mota sobu aat totál hanesan irrigasaun Osoria no Uaibilesa, kauza husi udan-boot ne’ebé difikulta agrikultór sira-nia atividade halo natar.
“Akontesementu udan-boot iha semana ne’e estraga irrigasaun rua iha ami-nia suku. Ami hato’o ba extensionista Uatucarbau no administradór postu Uatucarbau hodi buka meu halo normalizasaun. Se la halo normalizasaun, ita-nia agrikultór sira labele halai natar, tanba agora sira taka ona kabu maibé irrigasaun mota estraga tiha ona,” Patrício Maria Pinto hateten ba Agência Tatoli iha postu Vikeke Vila, ohin.
Tan ne’e, nia husu, Ministériu Agrikultór Peska, Pekuária no Floresta (MAPPF) moviliza ekipamentu pezadu hodi normaliza irrigasaun hodi fornese bee natar, atu agrikultór sira halo sira nian natar.
“Se ita la halo normaliza irrigasaun konserteza tinan ida-ne’e agrikultór suku Bahatata labele halo natar. Ho ida-ne’e mak ami husu ministériu aselera normaliza irrigasaun”. Nia hato’o
Tuir dadús natar husi irrigasaun Osoria fornese bee ba natar ektare 100 no irrigasaun Uaibilesa natar ektre 50. Husi natar sira-ne’e benifisia ba agrikultór sira husi suku Bahatata, Afaloikai no suku Loihulu.
Iha fatin seluk, xeta xefe aldeia Beturia, suku Irabin de Baixo, Manuel Julio Gomes, relata irrigasaun Hae-Oli foin lalais mak ekipamentu MAPPF hadi’a tiha irrigasaun maibé agora mota sobu totál ne’ebé agrikultór sira labele kuda hare.
“Irrigasaun Hae-Oli ne’e mota sobu iha domingu (16 Marsu 2025) ne’ebé ita-nia agrikultór sira labele kuda hare maibé natar kuaze halai hotu oan, maibé agora irrigasaun aat hotu ona. Ha’u fó hatene ona extensionista Uatucarbau nian, hodi haruka ekipamentu pezadu ba halo normalizasaun ba irrigasaun, maibé agora daudaun ne’e ekipamentu iha hela área Iliomar,” nia relata.
Tuir dadús, natar Hae-Oli ho rai ektare hamutuk 36 no sei fó benifisia ba uma kain 26 iha suku Irabin de Baixo, postu Uatucarbau, munisípiu Vikeke.
Hatán ba preokupasaun ne’e, sebisu MAPFF munisípiu Vikeke, Olivio Freitas Soares, hateten, ekipamentu pezadu ida mak koloka iha postu Uatukarbau no Ilimor ne’ebé irrigasaun sira-ne’ebé mota sobu, autoridade sira koordena operadór sira hodi’a normaliza irrigasaun.
“Daudaun ne’e, ita iha ekipamentu pezadu ida mak destaka iha postu ne’ebá, autoridade sira koordena direta ho operadór hodi halo normalizasaun ba irrigasaun tolu ne’ebé mota sobu,” nia dehan.
Notísia Relevante: MAPPF prevee millaun $5-resin konstrui irrigasaun iha Baucau-Bobonaro-Viqueque
Jornalista : Vitorino Lopes da Costa
Editór : Cancio Ximenes
