DILI, 24 Marsu 2025 (TATOLI)—Deputadu Bankada Opozisaun husi Frente Revolusionária do Timor-Leste Independente (FRETILIN), José da Crus, hateten, kliente Eletricidade de Timor-Leste, Empreza Públika (EDTL, E.P) iha suku balun iha postu Bobonaru seidauk asesu ba sentru venda pulsa, nune’e husu ba responsável atu estabelese.
“Povu postu administrativu Bobonaru ho suku 18, aldeia 63 ho área balun rurál tebes nia lamentasaun kona-ba nesesidade atu sosa pulsa ahi tanba liña eletrisidade tama hotu ona, dalabarak sira tenke mai sosa pulsa ahi to’o kapitál Maliana ho distánsia kilómetru 10 to’o 15 no gasta osan selu karreta bá-mai,” Deoutadu Opozisaun hato’o liuhusi reuniaun plenária Parlamentu Nasionál (PN), segunda ne’e.
Notísia relevante : Reprezentante povu husu EDTL, E.P tau atensaun ba sentru venda pulsa eletrisidade
Iha sorin seluk, Deputadu Bankada Governu husi Kongresu Nasionál Rekonstrusaun Timorense (CNRT), Anacleto Freitas, haktuir, iha postu Uatulari eletrisiade mate lakan no fó impaktu ba komunidade nia sasán eletrónika a’at nune’e husu ba responsável sira atu tau-atensaun hodi solusiona problema referidu.
Deputada Bankada Opozisaun husi Kmanek Haburas Unidade Timoroan (KHUNTO), Olinda Guterres, haktuir, bainhira nia halo kontaktu eleitorál iha aldeia Loko-Loko, postu Uatulari, munisípiu Vikeke, komunidade hato’o preokupasaun kona-ba seidauk asesu eletrisidade to’o agora.
Deputadu Bankada FRETILIN, Dario Madeira, levanta iha postu Uatulari suku foun ida Makadiki Uatane ho aldeia neen aumenta suku ida husi suku Uaitane nian ne’e rasik, aldeia Sana to’o agora la asesu eletrisidade.
Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun ne’e no sei envia ba entidade tutela hodi tau-atensaun.
Jornalista : Nelson de Sousa
Editora : Julia Chatarina
