DILI, 24 Marsu 2025 (TATOLI)–Jerente Konstrusaun Starking, Jovencio Rosário, hatete fizikamente konstrusaun tama ona ba finalizasaun, falta uma kakuluk no jardín.
“Konstrusaun hotu ona, hela de’it uma-kakuluk, ami hein atu hahú ho parte arkitetura obra ne’e mak jardín”, katak nia ba TATOLI iha Kolmera, segunda ne’e.
Jestór ne’e garante, obra ne’e bele ramata tuir kontratu. “Ami halo hela esforsu atu servisu iha tempu kalan para halo lalais servisu”.
Nia esplika, inísiu konstrusaun kompleksu tanba kondisaun rai no bee-rai-okos, maske nune’e serbisu ne’e pausa durante fulan-neen.
Kompleksidade seluk mak, nia dehan formatu obra ne’e rasik mak redonda. “Ita tenke taka ida-ne’e hosi leten no estrutura ne’e kompletu ona”.
Jardin Chama Eterna iha Arkivu Muzeu Rezisténsia Timorense (AMRT), nia dehan atinje ona liu pursentu 20.
Notísia relevante: Konstrusaun fíziku Jardim de Chama Eterna atinje 10%
“Konstrusaun tuir espesifikasaun (BoQ) atinje liu 20%. Oras ne’e daudaun, konstrusaun fizikamente ultrapasa persentajen sira ne’e. Ita tama iha finalizasaun tetu konstrusaun nian”, Jestór realsa.
Jestór Starking esplika, konstrusaun ne’e halo ona fundasaun, pilar no estrutura tomak husi konstrusaun fízika no to’o daudaun iha kakuluk obra ne’e hanesan dezeña iha espesifikasaun ho jardín iha leten.
Jovencio Rosário hatete obra fundasaun iha kakuluk projetu nian ne’e bele hotu iha fulan-Maiu, nune’e sei hahú ho sasán arkitetóniku sira ne’ebé espesífiku liu, hanesan iha dezeñu interiór hosi projetu ne’e.
Konstrusaun dura fulan 30 hahú Fevereiru 2023 to’o Setembru 2025 no hala’o hosi empreza Starking no MDF Acesso iha Joint Venture no supervizaun maka responsabilidade hosi Consorcio Soares no Guterres.
Notísia relevante: Konstrusaun Jardín Chama Eterna tama ona iha faze finalizasaun
Jornalista : Osória Marques
Editora : Rita Almeida
