DILI, 24 Marsu 2025 (TATOLI) – Ministériu Planeamentu no Investimentu Estratéjiku (MPIE) sei realiza, iha semana oin, formasaun ba tékniku planeamentu sira hamutuk 55 husi munisípiu Bobonaru no Ermera ba implementasaun Planu Ordenamentu Territóriu ne’ebé aprova ona husi Konsellu Ministru.
Planu ne’ebé aprova ona mak ba munsípiu lima nian hanesan Ermera, Bobonaru, Baukau, Lautein, no Vikeke.
Ba munisípiu Aileu, Ainaru, Kovalima, Manufahi, Likisá no Manatutu, nia planu sei iha hela konsulta públika molok aprezenta ba Konsellu Ministru.
“Ba munisípiu Ermera no Bobonaru ami daudaun halo preprasaun, semana oin sei fó treinamentu ba tékniku sira durante semana rua”, Diretór-Jerál Ordenamentu Territóriu MPIE, Roger Tertuliano Belo, dehan ba Tatoli, iha Fatuhada, ohin.
Objetivu husi treinamentu ne’e mak oinsá tékniku sira hatene planu sira ne’ebé aprova ona, ho baze ba ida-ne’e hodi implementa iha munisípiu, tanba planu ne’e rasik mai ho regulamentu ba utilizasaun espasu ka rai sira.
Nia fó ezemplu bainhira rai sira iha munisípiu ne’ebé risku ba dezastre naturál nian evita komunidade labele halo uma, no rai ne’ebé área agrikultura nian tenke utiliza ba agrikultura nian no labele halo fali uma no seluk tan.
“Ida-ne’e ami fó treinamentu ba sira nune’e iha terrenu idaidaik hatene halo kontrola ba implementasaun planu ne’e rasik”, dehan.
Kona-ba sosializaun ba Planu Ordenamentu Territóriu ne’e, nia esplika katak antes halo elaborasaun ba planu ne’e, ministériu envolve parte hotu iha munisípiu sira, ne’ebé sira hatene lala’ok ba implementasaun planu ne’e rasik.
Tuir nia, elaborasaun planu ne’e forma ekipa rua, komisaun orientasaun no ekipa téknika. Komisaun orientasaun ne’e envolve diretór-jerál sira hanesan husi Ministériu Agrikultura Pekuária, Peska no Floresta (MAPPF), Ministériu Turizmu no Ambiente (MTA) no seluk tan.
Ekipa téknika ne’e inklui Diretór Planeamentu Munisípiu sira, tékniku husi MPIE, ne’ebé akompaña direta prosesu elaborasaun hotu iha terrenu.
Notísia relevante: Planu Munisipál Ordenamentu Territóriu ba munisípiu tolu aprovadu
Jornalista: Arminda Fonseca
Editora: Maria Auxiliadora
