DILI, 12 Marsu 2024 (TATOLI) – Governu aprova, ohin, dekretu Governu tolu, relasiona ho Planu Munisipál ba Ordenamentu Territóriu Baukau, Vikeke no Lautein nian.
Ministru Planeamentu no Investimentu Estratéjiku, Gastão Francisco de Sousa, hateten planu sira-ne’e estabelese estratéjia dezenvolvimentu territoriál lokál, define polítika ordenamentu territoriál munisipál no urbanizmu no garante integrasaun polítika setoriál oioin ho impaktu ba territóriu munisipál.
Planu Munisipál ba Ordenamentu Territóriu nian hatudu, iha nivel lokál, matadalan sira ne’ebé estabelese ona iha instrumentu ba planeamentu estratéjiku nasionál, hodi asegura vizaun estruturadu ida ba kreximentu no dezenvolvimentu sustentavel munisípiu idaidak nian.
Nia dehan entre medida prinsipál, inklui definisaun ba modelu ordenamentu territoriál munisípiu nian, regulamentu husi okupasaun no utilizasaun rai no jestaun programada husi espasu públiku, hodi permite planeamentu ida ne’ebé efisiente liu no adapta ba nesesidade lokál.
“Planu Munisipál ba Ordenamentu Territóriu ne’e importante, tanba ita hakarak populasaun bá fali hela fatin, ita tenke kria uluk kondisaun sira iha munisípiu”, Gastão de Sousa dehan iha Palásiu Governu.
Nia lembra katak, planu antes ne’e, Governu aprova ona ba planu ba munisípiu Ermera, Bobonaru no agora aumetan tan tolu no munisípiu rua iha faze finalizasaun konsulta públika mak Ainaru no Aileu.
“Sei falta mak Kovalima, Manufahi, Likisá no Manatutu. Espera haat ne’e bele asina kontratu iha tinan ne’e nia laran. Pelu menus iha 2025 bele finaliza Planu Munisipál Ordenamentu Territóriu para ita haree fali fali Planu Urbanu Munsípiu nian”, dehan.
Nune’e maka tenke atrai populasaun atu fila ba sira-nia rai, tanba haree ba atividade ekonómika ne’e konsentra hotu iha Dili. “Tenke kria kondisaun atu ema filafali, tenke ho ordenadu ona, hanesan fatin ne’e ba uma tenke uma nian, ba edifísiu públiku tenke ba edifísiu públiku no seluk tan”.
Ministru realsa katak, ba munisípiu Dili nian, iha 2017, Ajénsia Kooperasaun Internasionál Japaun (JICA) halo estudu no aprova ona. “Agora, tenta atu haree filifali. Espera katak 2025 bele finaliza hotu, para depois legalidade urbinístika bele la’o tuir”.
Notísia relevante: Planu Nasionál Ordenamentu Territóriu aprova ona iha Konsellu Ministru
Jornalista : Arminda Fonseca
Editora : Maria Auxiliadora
