DILI, 24 Marsu 2025 (TATOLI)–Parlamentu Nasionál (PN) liuhusi sesaun plenária, segunda ne’e, aprova asentimentu dezlokasaun ofisiál Prezidente Repúblika (PR), José Ramos Horta, bá Turkia ho votu afavór 40, kontra haat no abstensaun ualu.
“Ne’ebé Prezidente bele bá Turkia,” Prezidente Parlamentu Nasionál, Maria Fernanda Lay, fó sai iha sala plenária PN.
Tuir termu previstu iha númeru 1 iha artigu 80 aliña ‘h’ númeru 3 artigu 95 Konstituisaun Repúblika, ho meiu ne’e PR Horta solisita ba PN konsentimentu préviu ba dezlokasaun ofisiál bá Turkia hodi resposta ba konvite husi Prezidente Repúblika Turkia, Recep Tayyip Erdogan, hodi partisipa iha edisaun dahaat Antalya Diplomacy Forum, ne’ebé previstu entre loron 11 to’o 13 Abríl 2025, iha Antalya-Turkia, ho nia tema ‘Reclaiming Diplomacy in a Fragmented World’.
Notísia relevante : PN autoriza PR Horta hala’o vizita Estadu bá Vietname
Ho meiu ne’e, Xefe Estadu informa sei auzente husi Timor-Leste entre loron 09 to’o 14 Abríl 2025.
Antes ne’e, iha loron 28 Janeiru 2025, PN autoriza PR Horta halo vizita ofisiál bá Emeradu Árabe Unidu (EAU) hodi partisipa simeira mundiál Governu 2025 ne’ebé realiza iha loron 11 to’o 13 Fevereiru.
Iha loron 17 Fevereiru, PN autoriza Xefe Estadu hala’o viajen ofisiál bá Vietname hodi partisipa iha fórum daruak Futuru ASEAN iha loron 25 to’o 26 Fevereiru 2025 iha Hanoi-Vietname.
Jornalista : Nelson de Sousa
Editora : Julia Chatarina
