DILI, 24 Marsu 2025 (TATOLI)—Diretór Servisu Saúde Munisípiu Dili, Mateus Pinto, informa Munisípiu Dili nu’udár munisípiu dahuluk ba Ministériu Saúde atu implementa programa Wolbachia iha Juñu-Jullu hodi redús kazu dengue ne’ebé tranzmite husi Aedes Aegity iha Timor-Leste.
“Programa Wolbachia ne’e importante tebes. Se ita hetan susesu, iha tinan rua ka tolu oin-mai ita haree redusaun ba kazu dengue, tanba labarik sira ho idade 15 mai kraik mak sofre liu moras dengue. Ami halo hela advokasia ba autoridade lokál sira to’o fulan-Abríl, depois iha Juñu-Jullu ita implementa ona programa ida-ne’e,” Mateus Pinto ba TATOLI, iha nia kna’ar fatin, Sentru Saúde Formosa, segunda ne’e.
Responsável ne’e garante katak kooperasaun entre Governu ho Menzies husi Austrália ho objetivu atu lori susuk Wolbachia ne’e sírkula iha Munisípiu Dili ho efetivu.
Notísia relevante: Governu prevee millaun $4,2 implementa programa Wolbachia atu kombate dengue
Nia esplika, Servisu Saúde Munisípiu Dili halo sensibilizasaun ba populasaun postu administrativu no xefe suku sira kona-ba ezisténsia no benefísiu husi Wolbachia iha munisípiu Dili.
“Ami hasoru-malu ho diretór postu saúde sira no xefe suku sira no informa ba sira katak susuk Wolbachia ne’e la fó perigu, maibé prevene moras dengue ba populasaun. Autoridade lokál no juventude apoia programa ida-ne’e ho 100%,” nia haktuir.
Tuir diretór ne’e, objetivu ida husi sensibilizasaun husi parte Servisu Saúde Munisípiu Dili nian mak atu asegura katak populasaun no autoridade lokál sira bele komprende programa Wolbachia, nune’e labele mosu dezentendimentu ruma bainhira prezensa susuk ne’ebé barak liu.
“Ami atu husik hela susuk sira-ne’e iha komunidade nia leet. Tanba ne’e mak ita presiza halo sensibilizasaun. Bainhira husu kona-ba númeru susuk Wolbachia ne’ebé atu husik hela iha-ne’e, susuk hamutuk liu rihun-ida mak sei husik hela iha Munisípiu Dili,” nia konklui.
Jornalista: Felicidade Ximenes
Editór: Xisto Freitas da Piedade
