DILI, 24 Marsu 2025 (TATOLI)-Prezidente Repúblika, José Ramos Horta, segunda ne’e simu delegasaun Guarda Nasionál Republikana (GNR) Portugál nian, ne’ebé lidera husi Tenente-Jenerál Rui Alberto Ribeiro Veloso, akompaña husi Embaixadora Portugál iha Timor-Leste, Manuela Bairros.
Sorumutu ne’e parte rua ko’alia konaba kooperasaun Polísia Nasionál Timor-Leste (PNTL) ho GNR ba futuru.
“Prezidente louva prezensa GNR nian no kooperasaun tomak ne’ebé instituisaun ne’e fó ba Timor-Leste. Ami mós diskute kona-ba forma kooperasaun sira seluk ba futuru, partikularmente iha nível polísia nian”, Tenente Jenerál Rui Veloso ba jornalista sira hafoin reuniaun ho Ramos-Horta iha Palásiu Prezidensiál Dili.
Rui dehan, GNR kolabora ona ho autoridade Timoroan sira durante tinan 25 resin, hodi hatete katak objetivu husi enkontru ne’e presizamente hametin kooperasaun.
“Ami fiar katak kolaborasaun ne’e bele hasa’e iha nivel lokál, nomeadamente ho polísia, avansa ho programa polisiamentu komunitáriu no habelar serbisu ba área sira seluk ne’ebé espesífiku liu, hanesan ambiente no fronteira sira”, Rui Veloso hakotu.
Rekorda katak, akordu kooperasaun ne’ebé eziste entre Timor-Leste ho Portugál, membru PNTL na’in rua Sarjentu Xefe Luis Castro Doutel no Ajente Francisco Viana partisipa 49.º Kursu Tránzitu ba seguransa iha GNR tinan tolu ba kotuk.
Kursu referidu hala’o iha Queluz, eskola Guarda ida ne’ebé iha ninia komponente teória, aplika materia ho módulu formasaun téknika professionál, módulu formasaun jurídika no investigasaun kona-ba asidente no módulu tékniku operasionál. Inklui komponente prátika ne’ebé tradús estájiu ida kurikulár iha Unidade Tránzitu GNR, ne’ebé lori tempu oras 320 no iha kursu ida ho totál oras 890.
Alénde apresiasaun akádemika, avaliasaun ba alunu sira iha ninia variedade husi kualidade físika, morál no sosiál, intelektuál no kulturál, ikus liu professionál na’in-rua membru PNTL hetan susesu iha konkretizasaun formasaun ninian.
Ne’e mak instrutór na’in rua da-uluk atu forma membru PNTL sira seluk iha kursu Tránzitu ba PNTL.
Daudaun ne’e PNTL sei prepara hela regra admisaun Planu Formasaun no Regra formasaun Tránzitu ba membru PNTL, ne’ebé sei hala’o iha Sentru Formasaun Polísia ho nia objetivu hametin no hasa’e kresimentu Seguransa Rodoviariu nian.
Notísia relevante: GNR Fasilita Formasaun Fulan Sia Ba Ofisiál Inspetór Polisia
Jornalista : Hortencio Sanchez
Editora : Rita Almeida
