DILI, 14 janeiru 2020 (TATOLI) – Ministru Interiór interinu, Filomeno da Paixão de Jesus, hato’o agradese ba Governu Portugál liuhusi apoiu Guarda Nasionál Republikana (GNR) ne’ebé fó apoiu másimu ba Sentru Akademia Formasaun Polisia (SFP) Comoro, Dili, hodi kapasita kandidatu Ofisial Inspetór Asistente Polisia Nasionál Timor-Leste (PNTL) na’in 53 ne’ebé tuir ona kursu durante fulan sia (9) nia laran.
Notísia Relevante : GNR-Polisia Austrália Kapasita Membru UEP Partisipa Misaun ONU
Ministru Filomeno apresia SFP hanesan eskola akademia polisia nian ne’ebé durante ne’e jere jestaun pedagójiku, kurrikulár no atividade aprendizajen hodi kapasita membru polisia hotu.
“Lori Governu nian naran hato’o agradesimentu tomak ba apoiu ne’ebé ekipa formadu fó liuhusi kooperasaun bilaterál ne’ebé governu Timor-Leste halo ho Governu Portugál através GNR ajuda tebes PNTL iha prosesu konkursu no selesaun,” hateten Ministru Filomeno akompaña husi Komandante Jerál PNTL, Komisáriu Faustino da Costa, durante vizita ba Sentru Formasaun Akademia Polisia, Comoro, Dili, ohin.
Durante hala’o vizita, ministru ho ekipa hasoru malu ho kandidatu Inspetór Asistente Polisia na’in 53 ne’ebé hahú kursu mai husi konkorrente na’in 329 ne’ebé kompete ba vaga 65 ne’ebé Komandu PNTL fó sai tuir rekizitu ne’ebé iha kandidatu hirak ne’e ho postu diviza Sarjentu too Sarjentu Xefe, Postu Sarjentu durante tinan haat, edukasaun mínimu baxarelatu no idade másimu 50.
Kandidatu hirak ne’e mai husi komandu Polisia Munisípiu 12, RAEOA, Unidade Polisia sira no Komandu Jerál. Kursu Promosaun ba Ofisial Inspetór (KPOI) hanesan kursu dahuluk ne’ebé halo ba Ofisiál Inspetór Asistente ho durasaun fulan sia (9) teoria no pratika iha terrenu tuir tempu ne’ebé determina atu bele kompleta antes sira hetan graduasaun.
Ministru Filomeno surpreza no admira ho progresu iha sentru formasaun ne’e, no kongratula Komandu Jerál PNTL ho nia instrutór sira no ekipa formadu GNR husi Portugál.
“Ohin hanesan surpreza boot ida mai ha’u tanba husi formandu na’in 53 ne’e, hotu-hotu bele ko’alia lian Portugés. Politikamente governu deside atu implementa diploma ministeriál ne’ebé Ministériu Interiór hasai, hodi realiza ba dahuluk kursu inspetór asistente iha instituisaun PNTL ida ne’e, ka iha forsa defeza nian ita hanaran alferes. Ha’u repara katak, iha ne’e partisipasaun feto menus liu, tanba ne’e iha oportunidade seluk, ita sei loke tan vaga ba ofisial sira, hein katak partisipasaun feto bele barak liután nune’e iha futuru bele mós lidera PNTL,” hateten Ministru Filomeno Paixão iha nia diskursu.
Nia dehan, tinan ne’e governu deside husi rekruta uluk membru F-FDTL foun na’in 600 no adia rekrutamentu ba PNTL hodi bele hadi’a Instituisaun PNTL.
“Ha’u laiha intensaun atu taka rekrutamentu ba PNTL. Ba tinan 2021 sei kontinua halo rekrutamentu maibé ita tenke aruma uma laran halo di’ak tiha lai, hodi iha kapasidade rekursu umanu, kapasidade lideransa, kapasidade koordenasaun hodi respeita Ierarkia vertikál. Ha’u mai para hadi’a PNTL no halo tuir polítika Governu nian. Dedikasaun no dezempeñu ba oin ne’e muda ona, labele hanesan uluk nafatin. Promosaun diviza ba ofisiál tenke liu husi formasaun, tanba ne’e ba oin tenke halo tan kursu ba kapitaun ofisiál sira selae ita hela iha kotuk nafatin,” nia hatete.
Atu lori PNTL sai profisionál, presiza iha koñesimentu iha aspetu hotu-hotu, inklui hatene lei, regulamentu dixiplinas no Estatutu Polisia nian.
“Ha’u nia esperansa katak kandidatu sira ne’e sei sai ofisiál ne’ebé formadu durante besik tinan ida ho kursu própriu ba ofisial Inspetór Asistente ho formasaun ne’ebé hetan ita espera katak ba iha futuru, bele sai polísia ne’ebé kredivel hetan konfiansa boot husi povu rasik,” nia apela.
Iha Vizita ne’e, Ministru Filomeno ho komitiva hetan akompañamentu husi Komandante Sentru Formasaun Polisia, Superintendente Polisia Arquimino Ramos ho nia Adjuntu Superintendente Asistente Polisia Boavida Ribeiro.
Jornalista : Eugénio Pereira
Editór : Francisco Simões
