KOVALIMA, 25 Marsu 2025 (TATOLI) –Autoridade suku Kamenasa liuhusi Xefe suku Fernando Noronha planeia sei promove dialógu ho joven sira iha suku ne’e. Suku Kamenasa kompostu husi aldeia sira hanesan Aldeia Sanfuk, Fatuisin, Manequin ho Ailok laran.
“Ha’u kria ona planu, tempu-badak sei halo diálogu ho joven sira atu fó hanoin ba joven feto no mane sira iha suku Kamenasa, oinsá atu bele redús problema ne’ebe mosu iha suku Kamenasa”, Fernando Noronha, dehan ba jornalista sira, iha suku Kamenasa, ohin
Intensaun líder másimu Suku Kamenasa, Postu administrativu Suai, Munisípiu Kovalima hakarak problema diálogu ho joven sira – feto no mane, tanba tuir nia observasaun katak sempre mosu konflitu iha suku referidu.
“Problema mosu iha suku Kamenasa ha’u halo monitorizasaun liga ba GAM, nune’e dala ruma ha’u fó hanoin, joven sira ne’ebé hamosu problema bainhira kondisaun hemu (lanu) hodi sadik malu to’o hamosu konflitu”, nia informa.
Autoridade lokál ne’e hateten, hanesan xefe suku, liman-ain husi Governu, nafatin fó hanoin ba joven sira, tantu feto no mane sira, oinsá bele minimiza problema joven sira, entre aldeia ba aldeia sira seluk.
Tuir xefe suku Kamenasa, durante ne’e mosu konflitu ki’ik sira no nia parte hanesan xefe suku nafatin enkoraja joven sira atu evita ka hamenus problema entre aldeia haat iha suku ne’e.
Prezidente Sub KRAM, Munisípiu Kovalima, Francisco Barros, rekoñese katak mosu duni konflitu entre joven sira iha suku Kamenasa maibé ne’e hanesan konflitu pesoál la’ós tanba GAM.
“Sim, hanesan Xefe suku preokupa mosu konflitu maibé la’ós reprezenta GAM maibé pesoál balun provoka malu hodi hamosu konflitu ki’ik. Ha’u observa konflitu entre GAM ami la hetan relatóriu ruma”, nia esplika.
Jornalista: Celestina Teles
Editór: Rafael Ximenes de A. Belo
