DILI, 25 Marsu 2025 (TATOLI)–Deputadu Bankada Opozisaun husi Frente Revolsionária do Timor-Leste Indepedente (FRETILIN), Dario Madeira, husu ba entidade ba Ministériu Asuntu Kombatente Libertasaun Nasionál (MAKLN) atu tau-atensaun ba restu mortál iha postu Uatulari ne’ebé durante tinan barak seidauk haloot iha fatin dignu.
“Husu ba Ministru Kombatente atu aselera lalais prosesu konstrusaun jardín ba eroi sira iha postu administrativu Vikeke Vila iha suku Uailete. Jardin ne’e komisaun rekolla restu mortál postu Uatulari mak ezije, tanba daudaun ne’e ita-nia restu mortál ha uma mahon iha postu Uatulari barak tebes kauze tinan 10-resin ona Governu laiha serteza bainhira mak haloot sira-nia restu mortál tau iha fatin ne’ebé dignu,” Reprezentante povu ne’e hato’o iha Parlamentu Nasionál (PN), tersa ne’e.
Notísia relevante : SEV prioritiza restu mortál iha munisípiu tolu
Aleinde ne’e, família saudozu sira ezije nafatin Governu atu tau-atensaun hodi haloot restu mortál iha fatin dignu tanba uluk sira fó an ba prosesu luta libertasaun.
“Uluk Governu promete katak bainhira rekolla restu mortál ne’e hotu no jardín hotu bele hakoi lalais iha tinan ida ka rua nia laran, maibé agora liu tinan 10 ona, husu ba ministériu kompetente bele tau matan lalais,” nia akresenta.
Iha sorin seluk, Deputada Bankada Governu husi Kongresu Nasionál Rekonstrusaun Timorense (CNRT), Maria Angela Goruvelo, husu atu Governu harii monumentu rai saudozu Sahe ninia restu mortál.
Deputadu Bankada Opozisaun husi Partidu Libertasaun Populár (PLP), Helder Freitas Kamarudi, haktuir, foin lalais bainhira nia halo fiskalizasaun ba projetu konstrusaun jardín eroi Likisa, haree iha kualidade di’ak no iha tempu badak sei entrega ba ministériu.
“Maibé ha’u-nia preokupasaun mak projetu ne’e totál orsamentu hira la hakerek iha plaka,” nia katak.
Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun ne’e no sei envia ba ministériu tutela hodi tau atensaun.
Jornalista : Nelson de Sousa
Editora : Julia Chatarina
