DILI, 25 Marsu 2025 (TATOLI)—Deputada Bankada Governu husi Kongresu Nasionál Rekonstrusaun Timorense (CNRT), Cedelízia Farria dos Santos, husu ba Governu liuhusi Ministériu Solidariedade Sosiál no Inkluzaun (MSSI) atu harii Lar de Idozu (Panti Jompo) ba idozu ho idade avansadu ne’ebé la hetan atensaun husi família.
“Sira ne’ebé ho kondisaun família la tau-matan bele lori tau iha Panti Jompo hodi Estadu bele tau-matan nune’e molok sira hakotu iis iha kondisaun di’ak. Ami husu favór tebes, maski ita Timor ne’e mai ho kultura sosiál, maibé kondisaun ne’e akontese duni, dalabarak Igreja liuhusi Padre no Madre sira mak tau-matan maibé hanoin to’o tempu ona Governu mós iha Panti Jompo ida hodi haree ba ita-nia maluk sira ne’ebé ho situasaun ida-ne’e,” Reprezentante povu ne’e hato’o iha Parlamentu Nasionál (PN)
Deputada hato’o asuntu ne’e tanba identidika idozu balun ho idade avansadu la hetan atensaun husi família.
“Informasaun ne’ebé ami simu, ita-nia maluk idade avansadu ou ita bele dehan idozu iha munisípiu sira no parte rurál mós iha parte balun husi Dili nian, iha família balun la’ós dehan maioria, família balun mak la tau-matan no sira hela iha kondisaun ida-ne’ebé mak abandonadu,” nia akresenta.
Notísia relevante : INSS ho Autoridade RAEOA halo pagamentu pensaun sosiál ba idozu-invalidés 263
Nia dehan, Governu fó ona subsídiu ba idozu sira ne’e hodi bele sustenta sira ne’ebé hela ho sira-nia família.
“Maibé sira ne’ebé iha família, dalabarak la tau-matan ne’ebé mak hela iha uma-ki’ikoan sira ne’ebé informasaun ami simu rasik. Ha’u hanoin ita preokupa ho situasaun ida-ne’e, Governu daudaun prepara hela planu asaun anuál ba tinan 2025. Ami husu liuliu ba MSSI atu halo mós planu ba fatin idozu sira-nia ou Indonézia karik ita bolu Panti Jompo,” nia akresenta.
Iha fatin hanesan, Deputadu Bankada Opozisaun husi Kmanek Haburas Unidade Timoroan (KHUNTO), Luís Roberto, hateten, presiza kria kondisaun ba idozu molok hakotu iis.
“Entaun ita kria kondisaun ba ita-nia ema sira ne’ebé mak ho kondisaun kbiit la’ek hanesan idozu ne’ebé Estadu rekoñese ona hodi fó subsídiu, maski ne’e la to’o no abele responde ba sira-nia nesesidade loron-loron maibé bele hakma’an, liuliu ba sira ho idade avansadu ne’ebé la hetan atensaun husi família, hanoin presiza mós kria kondisaun hanesan hela fatin molok hakotu iis,”
Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun ne’e no sei envia informasaun ne’e ba entidade tutela hodi tau-atensaun.
Jornalista : Nelson de Sousa
Editora : Julia Chatarina
