OEKUSI, 17 Marsu 2025 (TATOLI) – Ekipa husi Institutu Nasionál Seguransa Sosiál (INSS) hamutuk ho Autoridade Rejiaun Administrativa Espesiál Oekusi Ambeno (RAEOA), segunda ohin, halo pagamentu ba subsídiu pensaun sosiál trimestrál 2025 ba idozu no Ema ho Defisiénsia (EhD) na’in-263 iha suku Bene-Ufe sub-rejiaun Nítibe.
Pagamentu ne’e abertura direita husi Sekretáriu Rejionál ba Asuntu Administrasaun, Andre Lao, hodi husu ba benefisiáriu sira katak Governu apoia subsídiu ne’e kada fulan hodi sustenta nesesidade moris liuliu hola ai-han nutrítivu no hadi’a saúde.
Notísia relevante:INSS halo pagamentu ba pensaun sosiál iha 17 Marsu
“Osan ne’ebé Governu fó ne’e ba idozu ho idade 60 ba leten, imi laiha ona forsa servisu, inan-aman sira-nia kondisaun fiziku no idade labele halo servisu todan, tan ne’e Governu kria subsídiu ne’e, atu asegura sira-nia vida, liuliu atu hola ai-han ne’ebé di’ak atu konsumu, tenke ba konsulta saúde iha fasilidade saúde no labele servisu todan, tanba Governu fó insentivu ne’e ho objetivu atu hakman sira-nia nesesidade,” nia ko’alia iha sede suku Bene-Ufe, ohin.
Nia fó hanoin ba ekipa husi BNCTL no INSS atu garante pagamentu bele la’o ho seguru presiza promove liña koordenasaun, nune’e labele mosu problema iha durante prosesu pagamentu.
Iha fatin hanesan, Koordenadór INSS Oekusi, Teotonio Tolan, relata kaléndariu pagamentu ne’e hahú loron 17 Marsu sei remata iha loron 07 Abríl 2025, maibé dalaruma pagamentu ne’e la’o ho avansadu ka rapidu sei la to’o loron tarjetu ne’e ou bele liu tanba agora tempu udan.
“Ami hamutuk ho banku, ohin hahú halo pagamentu ba ferik no katuas sira no Ema ho Defisiénsia iha suku Bene-Ufe, no parte lokraik sei kontinua mai halo pagamentu iha suku Suni-Ufe,” Koordenadór INSS Oekusi ne’e afirma.
Tuir dadus totál benefisiáriu ba pensaun sosiál iha Oekusi husi 2024 rejista 7.055, maibé iha aumenta foun sira hamutuk 670, maibé dadús seidauk junta hamutuk ba kada sub-rejiaun sira.
Nune’e, ekipa sei halo pagamentu iha sub-rejiaun Nítibe ba benefisiáriu 1.454, hahú husi loron 17 to’o 19 Marsu 2025, mai husi suku lima mak hanesan, suku Bene-Ufe 263, Suni-Ufe 188, Usitako 342, Lela-Ufe 409 no suku Ban-Afi 252.
Iha loron 20 to’o 21 Marsu 2025, ekipa kontinua halo pagamentu ba benefisiáriu iha sub-rejiaun Pássabe 927 mai husi suku rua hanesan suku Abani 744 no Malelat 183.
Iha loron 24 to’o 26 Marsu 2025, ekipa kontinua ba halo pagamentu tan iha sub-rejiaun Oésilo ba benefisiáriu 1.681, mai husi suku tolu mak suku Bobometo 1.009, Usitasa’e 528 no suku Usitaqueno 144.
Pagamentu ikus iha sub-rejiaun Pante Makasar hahú iha loron 27 Marsu to’o 07 Abríl 2025 ba benefisiáriu 2.993, mai husi suku ualu mak hanesan, suku Naimeko 475, Bobokase 141, Cunha 523, Lalisuk 260, Taiboko 643, Costa 533 Lifau 268 no suku Nípani 150.
Tuir nia, benefisiáriu ne’ebé la’o labele ka moras, ekipa pagamentu sei la’o movél balun ho motorizada atu ba halo pagamentu direita ba sira-nia hela fatin. Maibé sira-ne’ebé uza ATM bele foti direita iha banku.
“Kritéria nafatin no laiha mudansa importante mak sira-nia dokumentu haneSan eleitorál, billete identidade ka sertidaun RDTL,” nia katak.
Durante prosesu pagamentu parte INSS mós konvida Provedória Direitu Umanu no Justisa (PDHJ) no apoia mós husi Polísia Nasionál Timor-Leste.
“Maibé kada tinan sempre la’o di’ak laiha problema kona-ba pagamentu, tanba balun kuandu la satifáz, hanesan osan la tama husi família mai husu klarifikasaun direita tanba osan ne’e povu nian, entaun benefisiáriu sira iha direitu atu simu,” nia dehan.
Notísia relevante:MSSI apoia miliaun $7-resin ba benefisiáriu Bolsa da Mãe kondisionál
Jornalista: Abílio Elo Nini
Editór: Florencio Miranda Ximenes
