DILI, 17 Marsu 2025 (TATOLI)-Governu liuhusi Ministériu Solidariedade Sosiál no Inkluzaun (MSSI) aprova orsamentu ho montante $7.012,716 ba benefisáriu iha territóriu hamutuk 68.669.
Diretór Jerál MSSI, Florencio Pina, hateten bolsa estudu inan kondisionál ne’e kontinua. “Labarik eskola primária ho osan dolar ualu, pre-sekundária dolar sia no sekundária $10. Ho nível edukasaun ne’e, labarik eskola ho kondisaun defisiénsia eskola ensinu báziku sei hetan subsídiu $13, ensinu pre-sekundaria $14 no defisiénsia eskola iha sekundária $15”, nia dehan iha MSSI Kaikoli, ohin.
Nia dehan benefisiáriu ba ensinu báziku nian hamutuk 40.293, feto iha 19.229 ho mane hamutuk 21.064. Alokadu ho montante $3,868,128. Ensinu pre-sekundária nia benefisiáriu hamutuk 21.981, feto iha 11.067 no mane hamutuk 10.914. Alokadu ho montante $2,373,948. Ba ensinu sekundáriu ho nia benefisiáriu hamutuk 6.422, feto iha 3.513 no mane hamutuk 2.909, alokadu ho montante $770,640.
“Orsamentu ida ne’e halo kalkulasaun ba benefisáriu sira iha munisipiu 12 inklui Oekusi. Ami prepara iha fulan-Janeiru no fulan-Fevereiru ho Marsu halo re-verifikasaun no ekipa hala’o hotu ona hein dadus update mai sistema. Atu hateten benefisáriu kalkula ne’e loos no totál hanesan ne’e ka lae, tanba ita hatene iha mós kritéria balun hahú aplika ba inan-aman sira-nia rendimentu sei diminui ho buat seluk tan”, nia esplika.
Pina hatete, agora fulan Marsu ona update sistema tama ona maibé re-verifikasaun la’os iha munisípiu de’it, tanba re-verifikasaun tenke to’o iha autoridade lokál sira mak sai matandalan hodi hasoru kada benefisáriu ida-idak nian.
“Ita hotu hatene problema klima depois MSSI hasoru difikuldade kona-ba transporte balun, maibé la’os tarde no ita nafatin esforsu to’o fim Marsu hodi hato’o dadus iha 2025. Ita sei halo verifikasaun ida ne’e sai determinante mós atu haree benefisáriu foun, maibé verifikasaun ne’e remata ita sei argumenta ba Ministra Soliriedade Sosial no Inklusaun sei konkorda hodi aprova”, dehan.
Notísia relevante: MSSI halo ona pagamentu ba benefisiáriu 68.896 Bolsa da Mãe Kondisionál
Jornalista : Osória Marques
Editora : Rita Almeida
