DILI, 13 Marsu 2025 (TATOLI) – Ministériu Solidariedade Sosiál no Inkluzaun (MSSI), liuhusi Institutu Nasionál Seguransa Sosiál (INSS) sei halo pagamentu, faze dahuluk, pensaun sosiál ba inan-aman, ne’ebé sei akontese iha 17 Marsu tinan ne’e.
“Informa ba públiku liuliu inan-aman no ema ho defisiénsia no líder komunitáriu katak, pagamentu ba faze primeira ba tinan 2025 nian sei hahú iha loron 17 Marsu 2025 no sei selu tuir rejiaun”, Ministra Solidariedade Sosiál no Inkluzaun, Verónica das Dores, hateten iha Kaikoli, ohin.
Nia adianta katak pagamentu iha parte leste sei hahú husi munisípiu Lautein, rai-klaran sei hahú husi Kovalima, Oeste husi Ermera. Ba Rejiaun Administrativa Espesiál Oekusi Ambenu no Dili sei hahú mós iha data hanesan.
Pagamentu ba faze dahuluk ida ne’e inklui mós retroativu ba munisípiu ne’ebé la konsege halo pagamentu iha trimestre dahaat tinan 2024.
Nune’e, pagamentu ba benefisiáriu sira nia orsamentu ne’e tuir idade no grau ne’ebé iha. Benefisiáriu 45.885 ho tinan entre 60 no 69 sei simu $60 kada fulan; benefisiáriu 44.121 ho tinan 70 to’o 79 sei simu $80 kada fulan; benefisiáriu 17.780 ho tinan 80 ba leten sei simu $100.
“Totál benefisiáriu iha territóriu, ne’ebé sei simu pensaun sosiál ba faze dahuluk tinan 2025 hamutuk 107.786 ho nia totál orsamentu $32.780.541”, nia relata.
Ministra Verónica realsa katak iha mós dadus benefisiáriu ne’ebé nia konta bankária iha banku komersiál sira mak hanesan Banku Nasionál Komérsiu Timor-Leste ho nia benefisiáriu hamutuk 107.042; iha Banku Nasionál Ultramarinu 387; Banku Repúblika 276; no Banku Mandiri 81.
Pagamentu retroativu ba benefisiáriu
Benefisiáriu sira ne’e seidauk simu sira-nia pensaun iha fulan-Outubru, Novembru, no Dezembru 2024 nian mak hanesan iha Lautein, Baukau, Ermera, Bobonaru, Kovalima no Likisá (metade),
Tuir Lista ne’ebé INSS no BNCTL iha, benefisiáriu hamutuk 48.128, (invalidéz 5.148 ka 10.7% no ferik-katuas 42.980 ka 89.3% mak seidauk simu sira-nia direitu ba pensaun sosiál.
“Husu ba munisípiu seluk ne’ebé enfrenta problema ho pagamentu bele informa ba pontu fokál INSS ka vizita eskritóriu INSS iha munisípiu hodi hato’o ita-boot sira-nia problema”, ministra dehan.
Pensaun sosiál iha faze dahuluk iha tinan 2025
Ministra Solidariedade Sosiál Verónica das Dores hateten benefisiáriu ne’ebé iha konta bankária no asesu ona kartaun ATM hamutuk 10.427. Benefisiáriu ne’ebe simu pagamentu ho konta bankária direta hamutuk 97.359
Aleinde ne’e, iha rejistru foun ba benefisiáriu iha tinan 2025 hahú husi Janeiru to’o Marsu hamutuk 2.961, ne’ebé iha hotu ona konta bankária.
“Apela nafatin ba autoridade kompetente hanesan xefe suku no aldeia atu informa ba benefisiáriu sira ne’ebé seidauk iha konta bankária hodi hakbesik aan ba banku komersiál hodi loke konta bankária, nune’e hafásil prosesu simu pensaun”, nia husu.
INSS elimina benefisiáriu ne’ebé simu subsídiu dupla
Ministra Verónica adianta katak INSS mós elimina ona benfisiáriu hamutuk 130 ne’ebé simu subsídiu dobru, tanba hetan saláriu nu’udar funsionáriu públiku.
“Benefisiáriu simu pagamentu dupla ne’ebé INSS identifika mak hanesan funsionáriu públiku no veteranu”, dehan.
Nune’e INSS elimina tuir Dekretu-Lei N.º 8/ 2024, 24 Janeiru, Alterasaun Dahuluk ba Dekretu-Lei n.º 53/2022, artigu 16 no 17 ne’ebe hateten katak “labele halo pagamentu ba benefisiáriu sira ne’ebé hetan Prestasaun Rendimentu Traballu nian ne’ebé integra iha Sistema Rejime Kontribuitivu”.
“Benefisiáriu ferik-katuas no invalidéz ne’ebé elimina husi lista pensaun sosiál tanba simu subsídiu veteranu hamutuk 542”, katak.
Kona-ba lala’ok pagamentu ba benefisiáriu iha tinan 2025 nian, governante ne’e hateten ba katak benefisiáriu pensaun sosiál ne’ebé utiliza kartaun ATM-BNCTL ka utiliza banku seluk maka INSS sei transfere osan ba banku hodi halo pagamentu kada fulan.
Ba benefisiáriu seidauk iha kartaun ATM tanba distánsia, pagamentu ba sira sei la’o kada fulan tolu.
Ba benefisiáriu ne’ebé moras no labele dezloka b fatin pagamentu, autoridade komunitária sei alista no entrega ema ne’ebé serbisu iha INSS no sentru sosiál munisipál sira hodi koordena ho BNCTL halo pagamentu.
“Husu ba família sira atu lalika lori benefisiáriu sira ne’ebé ho kondisaun moras to’o fatin pagamentu, tanba BNCTL ho INSS kompromitidu halo pagamentu iha uma ka sira-nia hela fatin”, nia apela.
Aleinde ne’e, benefisiáriu ba pensaun sosiál bele hili atendementu bankáriu elektróniku neʼebé BNCTL iha ho kustu ne’ebé estabelese iha regulamentu internu BNCTL no banku komersiál sira ne’ebé eziste iha Timor Leste.
BNCTL estabelese ona ajente banku nian iha suku sira, ne’ebé disponivel ona ba benefisiáriu atu foti direta iha ajente banku nian iha suku iha kada fulan no ba benefisiáriu ne’ebé mate ona sei la atende husi ajente ne’e.
“Benefisiáriu pensaun sosiál ne’ebé mate ona, família ne’ebé kuída benefisiáriu obrigatóriu hodi aprezenta deklarasaun óbitu ne’ebé asina husi autoridade suku no aldeia, ne’ebé iha koñesimentu husi fansionáriu INSS nian iha munisipiu, no bele aprezenta ba BNCTL, nune’e bele halo pagamentu. Ba família matebian sira katak sei simu direitu fulan oin ikus no BNCTL sei taka direta konta bankária”, adianta.
INSS mós rejista benefisiáriu pensaun sosiál sira ne’ebé iha deklarasaun óbitu husi autoridade kompetente hamutuk ema 246, kompostu husi ema ho defisiénsia 18 no ferik-katuas 228.
Jornalista: Osória Marques
Editora: Maria Auxiliadora
