Tatoli presiza hametin inovasaun, kriatividade no transformasaun dijitál – SEKOMS
DILI, 27 Jullu 2026 (TATOLI) – Sekretáriu Estadu Komunikasaun Sosiál (SEKOMS), Expedito Loro Dias Ximenes, husu ba Ajénsia Notisioza Timor-Leste Tatoli, Institutu Públiku (I.P) atu kontinua hametin invosaun, kriatividade no transformasaun dijitál hodi responde ba dezafiu komunikasaun iha tempu modernu.
Iha serimónia komemorasaun aniversáriu ba dékada ida iha edifísiu Tatoli, iha Faról, Dili,
Expedito hateten katak loron ohin la’ós de’it momentu istóriku, maibé mós signifikadu estratéjiku ba dezenvolvimentu imprensa nasionál.
“Ohin, ita la komemora de’it lala’ok tempu nian, maibé mós selebra realizasaun institusionál ida ne’ebé signifikativu tebes. Dékada ida serbisu nian husi Tatoli, I.P., Ajénsia Notísia Estadu nian”, dehan.
Nia mós lori Governu Dasiak, liuliu SEKOMS hodi hato’o parabéns ba Tatoli, lideransa, jornalista, editór, funsionáriu tékniku no administrativu sira hotu ba kontribuisaun ne’ebé fó durante tinan sanulu nia laran.
“Dinámika no dezafiu estratéjiku sira ne’ebé ita hasoru ohin loron, ezije kompromisu koletivu, transparénsia no lideransa ne’ebé orienta ba solusaun konkreta”, katak.
Nia akrexenta katak tuir prinsípiu governasaun di’ak, sustentabilidadeajenda dezenvolvimentu no polítika públika hotu depende maka’as ba konsolidasaun perspetiva no kumprimentu ba regulamentu sira ne’ebé aplikavel.
Tuir nia, estratéjia Governu nian la’ós de’it atu responde ba nesesidade iha tempu badak, maibé sai baze ba estabilidade iha tempu naruk, promove responsabilizasaun no optimiza utilizasaun rekursu sira ba benefísiu povu.
Governu reafirma nia kompromisu atu kontinua loke diálogu konstrutivu, inkluzivu no partisipativu ho elementu relevante hotu.
“Ami fiar katak liuhusi kolaborasaun sólida entre setór sira no konfiansa mútua, dezafiu hotu ne’ebé Governu hasoru bele transforma ba oportunidade ida ba progresu ho sustentavel liuhusi notísia loron-loron”, nia dehan.
Expedito hateten katak bainhira Tatoli tama ba dékada daruak, dezafiu sira ne’ebé hasoru la hanesan ona. Paizajen komunikasaun globál hetan ona mudansa radikál. Ema nia padraun konsumu notísia muda ona ba ekosistema dijitál ida ne’ebé lalais, iha ligasaun maka’as no orientadu ho algoritmu.
Hasoru realidade ida-ne’e, nia husu ba Tatoli atu kontinua halo mudansa fundamentál liuhusi pilár estratéjiku tolu – inovasaun, kriatividade no transformasaun dijitál.
Tuir nia, transformasaun dijitál labele interpreta de’it hanesan muda testu notísia nian hosi imprime ba website ka mídia sosiál. Ida-ne’e mak revizaun komprensivu ida ba sistema serbisu nian.
Tuir nia, transformasaun dijitál la’ós de’it muda plataforma hosi mídia imprime ba website ka mídia sosiál, maibé envolve reforma komprensiva ba sistema servisu tomak.
“Ajensia Notisioza TATOLI tenki adopta teknolójia foun hanesan análize Big Data, automatizasaun sala redasaun intelijente, utilizasaun étika ba intelijénsia artifisiál, no mós fortalese meiu verifikasaun dijitál hodi responde papel Clearing House”, nia afirma.
Hodi enfatiza, etapa ida-ne’e krusiál atu aselera fluxu serbisu no habelar alkanse transmisan lahó sakrifika ezatidaun ka faktu legál sira.
Governu fiar metin katak, ho espíritu foun, integridade ho profesionalismu, TATOLI, sei kontinua sai naroman komunikasaun nasionál nian iha futuru.
“Mai ita halibur ita-nia vizaun no pasu estratéjiku hodi realiza governasaun ho integridade, justisa no impaktu reál ba sosiedade tomak, liuhosi informasaun”, konklui.
Jornalista: Nelson de Sousa
Editora: Maria Auxiliadora
