Aero Dili translada restu mortál bispu na’in-tolu husi Bali mai Timór iha 01 Setembru

DILI, 31 Jullu 2026 (TATOLI) – Restu mortál bispu na’in-tolu Timor-Leste nian sei to’o iha Dili iha 01 Setembru 2026, liuhusi aviaun Aero Dili ne’ebé sei lori husi Bali, Indonézia.

Tanba ne’e Governu, liuhusi Ministériu Administrasaun Estatál (MAE) realiza reuniaun koordenasaun ho ministériu relevante sira hodi diskute kona-ba preparativu sira ba serimónia transladasaun restu mortál preladu katóliku ka bispu na’in-tolu husi Portugál mai Timor-Leste.

“Governu apoia igreja to’o restu mortál ne’e mai Timor-Leste, ne’ebé sei to’o iha 01 Setembru 2026. Aero Dili mak lori husi Bali mai”, Ministru Administrasaun Estatál, Tomás Cabral, hateten ohin.

Governante ne’e esplika katak, molok translada restu mortál sira, iha 18 Agostu 2026 sei realiza misa agradesimentu iha Igreja Espírito Santo, Évora, Portugál, ne’ebé sei prezide husi Bispu Dioseze Baukau, Don Leandro Maria Alves. Ministru Planeamentu no Investimentu Estratéjiku, Gastão de Sousa, sei reprezenta Governu Timor-Leste iha serimónia ne’e hodi hato’o agradesimenru ba Governu Portugál, tanba durante rai no kuída restu mortál sira.

Iha 19 Agostu 2026, sei realiza tan misa iha Katedrál Évora, ne’ebé Prezide husi Patriarka Lizboa ho partisipasaun husi Nunsiatura Apostólika no bispu sira hotu.

“Iha ne’ebá, Governu Portugál halo diskursu entrega [restu mortál] bispu rua sidadaun portugés ba ita no ita-nian rasik no Governu Timor-Leste sei agradese ba Governu Portugál tanba sira-nia disponibilidade fó fila ruin sira ne’e mai”, dehan.

Tuir nia, ekipa husi Dili sei bá Portugál atu simu dokumentasaun ofisiál no akompaña prosesu transladasaun. Ekipa ne’e sei serbisu hamutuk ho Polísia Portugál no ajénsia transporte ne’ebé Governu kontrata atu lori urna sira husi husi Évora bá aeroportu Lizboa.

“Iha 22 Agostu 2026, seladu kaixaun. Ekipa husi Timór sei simu dokumentu no ajénsia ida ita kontrata bá rekolla sasán sira ne’e hatama urna ruin ne’e ba aviaun to’o iha Bali. Depois 01 Setembru 2026 sei lori ho Aero Dili”, hateten.

Nia subliña katak bainhira restu mortál sira to’o Dili, sei simu ho guarda onra husi FALINTIL-Forsa Defeza Timor-Leste (F-FDTL), antes Governu entrega ba Konferénsia Episkopál Timorense (CET, sigla portugés).

Hafoin entrega, igreja sei organiza serimónia relijioza no omenajen iha fatin balun, inklui Laleia, Manatutu no Tasi-Tolu, Dili. Serimónia sira ne’e hotu sei tranzmite direta husi Rádiu Televizaun Timor-Leste RTTL, E.P.

Reuniaun koordenasaun ne’ebé realiza ohin envolve Ministériu Interiór (MI), Ministériu Defeza (MD), Ministériu Transporte no Komunikasaun (MTK), RTTL, E.P., no Autoridade Nasionál Aviasaun Timor-Leste (ANATL), hodi asegura preparativu hotu ba simu restu mortál sira iha Dili.

Bispu na’in-tolu ne’ebé sei translada husi Portugál mai Timor-Leste mak Don Jaime Garcia Goulart, Bispu Dili (1941-1967), Don José Joaquim Ribeiro, Bispu Dili (1967-1977) no Monsinór Martinho da Costa Lopes, Bispu Dili (1978-1983).

Notísia relevante: Transladasaun restu mortál Bispu na’in-tolu rekoñese legadu espirituál no istóriku

Jornalista: Arminda Fonseca

Editora: Maria Auxiliadora