BOBONARU, 25 Marsu 2025 (TATOLI)-Eletrisidade Timor-Leste, Empreza Públika (EDTL, E.P) munisípiu Bobonaru aplika multa ba konsumidór enerjía eletrika hamutuk uma-kain 18 ho totál orsamentu $9,350 tanba halo ligasaun direta ka ilegál.
Jestór EDTL, E.P munisípiu Bobonaru, Mario de Jesús, konfirma totál konsumidór-18 ne’e, uma-kain neen mak kumpre ona, hodi selu multa $2,800, falta 12 ho osan $6,500.
Notísia Relevante:EDTL Bobonaru dezliga ligasaun ilegál ualu iha Tapo-Memo
“Ami deteta iha suku Tapo-Memo no mos kapitál Maliana”, nia informa ba jornalista sira iha nia knaar fatin, tersa ne’e.
Uma-kain neen ne’ebé kumpre ona hodi selu multa, Mario de Jesús dehan ekipa tékniku normaliza ona koneksaun, enkuantu uma-kain 12 ne’ebé seidauk selu multa sei kontinua hela iha nakukun. “Momentu ami hakotu koneksaun, ami fó ona xamada”.
Nia dehan atividade inspesaun tama no sai uma sei kontinua, la’o kobre postu administrativu neen, suku 50. Tanba, konsidera atu sira ne’e estraga sistema distribuisaun inklui kontadór, liu-liu fó prejuízu ba Estadu.
Operasaun ne’e realiza bazeia ba dekretu lei númeru 33/2017, 17 Agostu, ne’ebé ko’alia konaba regulamentu ba lisensiamentu enerjia eletrika ho nia tarefa atu asesu ba ligasaun liña enerjia eletrika.
EDTL, E.P anúnsia ona ba publiku katak sei fó toleránsia ba konsumidor sira durante loron 30 hahú 03 Fevereiru to’o 03 Marsu 2025 atu mai rejistu iha edifísiu EDTL, E.P hodi halo normalizasaun liña ho gratuita no bainhira la kumpre Empreza Estatál sei aplika zero toleránsia ba kualker kliente inklui funsionáriu EDTL,EP.
Tuir dekretu lei númeru 33/2016, 17 Agostu haktuir, kliente ne’ebé ligasaun ilegál ba rede públika elektrisidade ho la utiliza kontadór elektriku sei multa $100 to’o $2000 ba konsumidór sira doméstiku, no $2000 to’o $15.000 ba konsumidó ho kategória seluk.
Sira ne’ebé halo ligasaun ilegál sei multa administrativa ho montante husi $500,00 to’o $2.000,00. Kliente ne’ebé troka ka modifika ekipamentu elétrika ne’ebé EDTL, E.P monta sei multa administrative $100 to’o $2000 ba konsumidór sira doméstiku no $2000 to’o $15.000 ba konsumidó kategória seluk.
Notísia Relevante:EDTL Bobonaro rekolla reseita $470,495.88
Jornalista : Sergio da Cruz
Editora : Rita Almeida
