BOBONARU, 11 Marsu 2025 (TATOLI)—Eletrisidade Timor-Leste, Empreza Públika (EDTL, E.P) delegasaun territoriál munisípiu Bobonaru, tersa ne’e, realiza atividade operasaun tama-sai uma hodi buka kliente ne’ebé durante ne’e halo ligasaun direta ka dada ahí ho ilegál.
Atividade ne’e faze dahuluk hala’o iha suku Tapo-Memo, postu administrativu Maliana ne’e, EDTL, E.P Bobonaru provizóriu dezliga ka hakotu liña eletrisidade iha uma kain ualu (8) ne’ebé halo ligasaun ilegál ka la sosa pulsa eletrisidade.
Notísia Relevante: Dada ahi ilegal, kliente tolu multa $24.000 ba EDTL,E.P
“Tesi tiha. Haree, sira tau kontadór Amper ida (1) iha laran ne’ebám ida ne’e atetude ne’ebé la di’ak. Hasai kuadru, ne’e ita ko’alia la di’ak,” Koordenador EDTL, E.P munisípiu Bobonaru, Mario de Jesús, hateten bainhira identifika kliente sira halo ligasaun direta ka halo ligasaun ilegál.
Durante operasaun, Jerente EDTL, E.P munisípiu Bobonaru mós, apela ba viziñu sira provizóriamente labele fahe liña ba kliente ne’ebé EDTL, E.P hakotu liña tanba aktu ne’ebé sira halo kontra lei no tenke kumpre selu multa hafoin tékniku sira halo ligasaun foun.
Operasaun ne’e realiza, bazeia badekretu-lei Nú. 33/2016, 17 Agostu, kona-bá Regulamentuba Lisensiamentu Enérjia Elétrika ho Nia Tarefa Siea, atu hetan ka asesu ba ligasaun liña enérjia elétrika.
Molok ne’e, EDTL, E.P anýunsia ona ba públiku katak sei fó toleránsia tempu ba konsumidór sira durante loron 30 hahú husi 03 Fevereiru to’o 03 Marsu 2025, atu mai rejistu iha edifísiu EDTL, E.P hodi halo normalizasaun liña ho gratuita. Bainhira la kumpre, empreza Estatál sei aplika Zero Toleránsia ba kualker kliente inklui funsionáriu EDTL, E.P tanba konsidera aktu hirak ne’e sei estraga sistema distribuisaun enérjia, inklui ekipamentu (kontadór) liuliu fó prezuiju ba Esatadu.
“Ita Estadu agora ezije hela ami empreza katak montante rihun $60-resin ne’ebé Estadu fó tenke ami atinje iha tinan ida-ne’e, tanba ida-ne’e mak ami servisu makaas hela,” Mario de Jesús dehan.
Tuir Observasaun Agência Tatoli iha terrenu nota katak kliente sira maioria koopera ho tékniku EDTL, E.P no hirak ne’ebe kontra lei mós prontu selu multa tuir lei ne’ebé aplika.
Enkuantu operasaun ne’e sei realiza kobre suku 50, postu administrativu neen (6) ne’ebé eziste iha Munisípiu Bobonaru ho totál kliente liu rihun-18.
Tuir dekretu-lei Nú. 33/2016, 17 agostu, kona-ba regulamentu ba lisesnsa Enérjia Elétrika ho niaTarefa sira, artigu 13 husi dekretu-lei ne’e mensiona;
a. Kliente ne’ebé ligasaun direta ilegál ba rede públika eletrisidade ho la utiliza kontadór elétriku sei multa $100 to’o $2000 ba konsumidór sira doméstiku, no $2000 to’o $15.000 ba konsumidór kategoria seluk.
b. Halo ligasaun ilegál ba rede eletrisidade liuhusi intervensaun eletrisista ne’ebé la autoriza husi EDTL, E.P sei multa administrativa ho montante husi $500,00 to’o $2.000,00.
c. Kliente ne’ebé troka ka modifika ekipamentu elétrika ne’ebé EDTL, E.P monta, sei multa administrativu, $100 to’o $2000 ba konsumidór sira doméstiku, no $2000 to’o $15.000 ba konsumidór kategoria seluk.
Notísia Relevante: EDTL Bobonaro reinstala kontadór iha postu administrativu haat
Jornalista : Sérgio da Cruz
Editór : Cancio Ximenes
